Gobiernu del Principau d'Asturies

Asturies, muncho más cerca

Tas en

Asturias.es El Ministeriu de Sanidá premia la estratexa d’atención primaria ...
 

Aniciu

El Ministeriu de Sanidá premia la estratexa d’atención primaria del área IV pa la prescripción correcta d’antibióticos

El 75 % de los indicadores sobre l’usu d’estos fármacos ameyoró dende qu’empezó’l proyectu va un añu. El reconocimientu va entregase en Madrid el martes que vien, Día Mundial de la Seguranza del Paciente. La resistencia a estos medicamentos causa al añu más de 600 muertes n’Asturies y 25. 000 n’España, según estimaciones de la Organización Mundial de la Salú

10/09/2019

El Ministeriu de Sanidá, Consumu y Bienestar Social premió la estratexa d’atención primaria del área sanitaria IV, con cabecera n’Uviéu, pa la prescripción correcta d’antibióticos, que nel so primer añu d’aplicación foi quién a ameyorar el 75 % de los indicadores que s’usen pa evaluar l’usu d’estos fármacos.

El premiu, que reconoz el desenvolvimientu de práctiques segures nel marcu de la Estratexa de Seguranza del Paciente del Sistema Nacional de Salú, va dase’l martes que vien en Madrid, coincidiendo col Día Mundial de la Seguranza del Paciente.

Ente otros llogros, la estratexa ameyoró’l consumu d’antibióticos d’usu sistémicu, y amenorgó’l porcentaxe de población que consume de manera indiscriminada antibióticos, dende’l 37,44 % hasta’l 36,76 %.

“Ye un proyectu humilde, de costu bien pequeñu, que demuestra que con imaxinación, esfuerciu y compromisu somos capaces a avanzar”, esplicó’l subdirector d’Atención Sanitaria del área IV, Ricardo de Dios.

El trabayu premiáu, tituláu Evaluación del proyecto de mejora de la prescripción de antimicrobianos en atención primaria del área sanitaria IV, foi ellaboráu pol comité d’usu racional del antibióticu, qu’integren, amás de Ricardo de Dios, los coordinadores d’equipos, Natalia Izquierdo y Belén Prieto; el médicu de familia y coordinador del centru de salú de Teatinos, Juan Carlos Cobo; el pediatra del centru de salú de La Iría Ignacio Carvajal, les farmacéutiques d’atención primaria Oliva Gutiérrez y Marta Martínez; la microbióloga del HUCA Eugenia Llaneza, y el técnicu de Salú Pública Julio César Alonso.



25.000 muertes al añu n’España

La Organización Mundial de la Salú (OMS) considera les resistencies a los antibióticos como ún de los mayores problemes de salú pública. Ello ye que se calcula que l’usu indiscrimináu d’esta clas de fármacos causa al añu más de 600 muertes n’Asturies y 25.000 n’España.

La OMS calcula que nel 2050 la resistencia a los antibióticos va xenerar 10 millones de muertes anuales nel mundu. Pa lluchar contra ella, el Ministeriu de Sanidá ellaboró’l Plan Nacional de Resistencia a Antibióticos. Pela so parte, n’área sanitaria IV estableciéronse l’añu pasáu dos comités, ún nel HUCA y otru n’atención primaria, pa rebaxar el consumu indiscrimináu d’estos fármacos.

Asina, ameyoráronse les indicaciones clíniques pa escoyer l’antibióticu más afayadizo pa cada tipu d’infección. Los profesionales prescriptores del área puen acceder al traviés de la intranet a documentos científicos y informes actualizaos sobre l’usu racional del antibióticu aplicao a la práctica clínica diaria. Amás, paralelamente, llanzóse una campaña de sensibilización a los usuarios en tolos centros de salú d’Uviéu y los conceyos vecinos.

El proyectu va siguir n’ochobre con cursos sobre l’usu racional de los antibióticos pa los médicos de familia del área y una campaña nueva de sensibilización a la ciudadanía, onde van tener una participación activa los profesionales d’enfermería.

 

Información sobre el documento

© Copyright 2006. Gobiernu del Principau d'Asturies