Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies apuesta por un fondu européu específicu ...
 

Aniciu

El Gobiernu d’Asturies apuesta por un fondu européu específicu pa encarar la transición enerxética de les rexones del carbón

El Principáu defende qu’estes ayudes seyan un complementu al presupuestu de la Unión Europea y nun supongan una mengua nos fondos de cohesión que recibe la comunidá. La conseyera de Facienda afirma que la clave ta en cuntar cola financiación necesaria pa qu’esti procesu nun llastre la competitividá de la industria

La consejera de Hacienda, Ana Cárcaba, en la segunda sesión del pleno del Comité de las Regiones

09/10/2019

El Gobiernu d’Asturies defendió güei en Bruseles la necesidá de que la Unión Europea (UE) disponga pa los años vinientes d’un fondu específicu pa sofitar les rexones carboníferes nel procesu de transición enerxética. La conseyera de Facienda, Ana Cárcaba, espunxo la posición del Principáu énte’l Comité de les Rexones, que s’axunta estos díes na capital belga. “Precisamos financiamientu pa llevar a cabu los proyectos que nos dexen pasar d’un mix enerxético basao nel carbón a otro anovable y diversificao”, esplicó.

L’Executivu autonómicu demanda tamién que les ayudes pa la transición seyan un complementu al presupuestu de la UE y s’articulen de manera independiente a los demás fondos de cohesión. “Queremos que se cree un fondu específicu y que nun se reste financiamientu del paquete fondos de cohesión”, destacó Cárcaba.

La conseyera fixo estes reivindicaciones nel marcu d’una conferencia d’altu nivel entamada pola mor del Comité de les Rexones, onde representantes de dellos territorios de la UE debatieron sobre’l futuru de les rexones del carbón.

La postura que defende’l Principáu compártenla miembros destacaos de les instituciones europees; por exemplu, el comisariu actual de Presupuestos, l’alemán Günther Oettinger, que manifestó énte’l Comité de les Rexones la necesidá de que’l futuru fondu pa la transición enerxética seya específicu y independiente de les demás ayudes. “Enfotámonos en que la postura d’Oettinger seya la definitiva”, sorrayó Cárcaba.

La titular de Facienda tuvo acompañada güei pol director xeneral d’Asuntos Europeos, Javier Vila, y la directora xeneral d’Enerxía, Minería y Reactivación, Belarmina Díaz, nes reuniones celebraes en Bruseles.

   Icono gráfico alusivo al tipo de archivo Audiu (Audiu: 767 Kb) (n'español)

Información sobre el documento

© Copyright 2006. Gobiernu del Principau d'Asturies