Gobiernu del Principau d'Asturies

Asturies, muncho más cerca

Tas en

Asturias.es Temes Xusticia El Gobiernu d’Asturies cunta llicitar anguaño la construcción ...
 

Xusticia

El Gobiernu d’Asturies cunta llicitar anguaño la construcción del edificiu que va unificar los xulgaos de Llangréu

El Principáu dispón yá del proyectu de construcción del inmueble, que’l so costu xube a 5 millones. El conseyeru de Presidencia destaca na Xunta Xeneral el compromisu del Executivu con esta infraestructura

El consejero de Presidencia y Participación Ciudadana, Guillermo Martínez

14/03/2019

El Gobiernu d’Asturies cunta llicitar anguaño la construcción del edificiu que va unificar nuna sede los xulgaos actuales de Llangréu. Pa eso, la Dirección Xeneral de Patrimoniu dispón yá del proyectu d’execución del inmueble, que’l so diseñu axudicóse n’ochobre del 2017 por importe de 58.000 euros, y trabaya na redacción de los pliegos alministrativos.

Asina lo anunció güei’l conseyeru de Presidencia y Participación Ciudadana, Guillermo Martínez, na Xunta Xeneral del Principáu, onde repitió que la construcción de la sede xudicial nueva “ye un compromisu del Executivu autonómicu y una de les actuaciones incluyíes ente les propuestes de meyora de les sedes xudiciales”.

Nesti sentíu, recordó que’l Principáu invirtió más de 4,5 millones n’infraestructures xudiciales del 2015 al 2018, ente contratos d’obres y caltenimientu d’edificios. “Tamién executemos actuaciones rellacionaes cola modernización de la xusticia por más de 3,2 millones nos trés últimos años, lo que nos dexó anovar cuasimente tolos equipos informáticos, sustituyir los periféricos y actualizar sistemes y sirvidores”, añedió.

En cuantes al proyectu pa Llangréu, l’edificiu nuevu va cuntar con una superficie construyida de 3.362 metros cuadraos y el so presupuestu de llicitación va xubir a 5.098.273 euros. Amás de los distintos xulgaos que va acoyer, l’inmueble va incluyir tamién les sales de vistes y multiusos, la oficina del Rexistru Civil, les dependencies pa pieces de convencimientu y archivos, un área de deteníos, los despachos de la Fiscalía y de clínica médico-forense, una biblioteca y sala de xuntes, les estancies d’abogaos y procuradores y otros espacios pa comunicaciones y aseos.

La sede xudicial nueva va responder a estos factores que la Dirección Xeneral de Xusticia considera necesarios pa la prestación óptima del serviciu a la ciudadanía:

   - Eficiencia y optimización de les superficies.
   - Racionalización de los espacios a tenor del llabor xurisdiccional.
   - Independencia d’espacios públicos al respective d’aquellos que se consideren d’usu acutáu o aptu pa personal autorizao.
   - Sostenibilidá y eficiencia enerxética.
   - Predominiu de lluz natural.
   - Facilidá nos accesos.

Depués de la recepción del proyectu, en xunetu del 2018, el Principáu solicitó al Conceyu de Llangréu l’estudiu de detalle preceptivu qu’ha regular la parcela sobre la que se va edificar la sede xudicial nueva y ensin el que nun ye posible realizar actuación dalguna. Desque s’aprobó l’estudiu pol Consistoriu, el 1 d’avientu del añu pasáu, el Gobiernu trabaya agora na redacción de los pliegos pa sacar a llicitación la obra.

 

Información sobre el documento

© Copyright 2006. Gobiernu del Principau d'Asturies