Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances El Gobiernu d’Asturies va analizar toles opciones pa caltener el ...
 

Economía y finances

El Gobiernu d’Asturies va analizar toles opciones pa caltener el texíu industrial nes plantes de Vesuvius

Una mesa técnica va estudiar les alternatives productives pa les factoríes de Llangréu y Miranda de Ebro, depués de confirmar la multinacional el zarru d’entrambos centros. “El nuestru compromisu ta coles 128 families afectaes y dende’l primer momentu tuvimos al llau de los trabayadores presentando propuestes y midíes constructives”, afirma la directora xeneral d’Industria

12/10/2019

El Gobiernu d’Asturies, en coordinación col Ministeriu d’Industria, la Xunta de Castiella y Llión, los conceyos de Llangréu y Miranda de Ebro y representantes de la plantiya, va analizar toles alternatives y opciones posibles pa caltener el texíu industrial y l’empléu nes factoríes de Vesuvius, tal como fixo dende’l 5 de setiembre, cuando tuvo conocimientu del determín de la compañía.

Rosana Prada, directora xeneral d’Industria, señala que “a pesar de que nun hai xustificación nenguna pal zarru de Vesuvius y el treslláu de la producción a Polonia, la República Checa y Turquía, determín que la empresa caltién”, la situación entra agora nuna fase nueva cola puesta en marcha d’una mesa técnica pa estudiar alternatives industriales pa los dos centros productivos.

Nesa mesa van tar representaes de les alministraciones locales, rexonales y estatal y los representantes de los trabayadores, y tamién se convidó a Vesuvius pa qu’ayude a caltener el texíu industrial n’Asturies y en Castiella y Llión. Amás, solicitóse a la multinacional una ampliación del periodu de consultes del espediente de regulación d’empléu pa que caltenga l’actividá hasta que s’atopen alternatives a los zarros.

La directora recordó que, anque’l Gobiernu d’Asturies nun pue interferir nes decisiones qu’una empresa privada adopta nel marcu de les sos estratexes corporatives, dende’l primer momentu realizáronse toles acciones posibles pa evitar que la compañía punxere en marcha l’espediente de regulación d’empléu (ERE) y el cese de la so actividá manufacturera n’Asturies y Burgos.

Asina, a lo llargo del últimu mes hubo contactos permanentes col Ministeriu d’Industria, cola Xunta de Castiella y Llión, coles corporaciones municipales de Llangréu y Miranda de Ebro, colos representantes de los trabayadores y con IndustriALL Global Union, la federación internacional de trabayadores del sector mineru, enerxéticu y industrial, que representa a 50 millones de persones en 140 países.

Amás, dende’l Ministeriu d’Industria celebráronse conversaciones al nivel más altu colos responsables de la compañía pa tentar de frenar los zarros, teniendo en cuenta que les factoríes son competitives, altamente productives, nun tienen problemes estructurales y tienen una posición de mercáu sólida, como la mesma empresa reconoció nes reuniones qu’hubo.

Frutu d’estes actuaciones, púnxose en marcha una mesa de diálogu cola participación de toles entidaes y partes implicaes que celebró dos reuniones, la postrera d’elles ayeri mesmo. Nesti marcu, les alministraciones manifestaron el so compromisu cola actividá industrial y el caltenimientu de los 128 empleos directos de Vesuvius, polo qu’ufiertaron facilidaes d’inversión, sofitu institucional y suelu pa que la compañía siguiere asitiada en Llangréu y Miranda de Ebro, opciones que la multinacional refugó.

“El nuestru compromisu ta coles 128 families afectaes y dende’l primer momentu respondimos con axilidá, presentando propuestes y midíes constructives, a pesar de la poca receptividá manifestada pola compañía”, añedió la directora xeneral.

“Los resultaos llograos na solución a crisis industriales de va poco como la d’Alcoa y les midíes impulsaes pa encarar situaciones complexes como la de Duro Felguera, dientro d’un marcu de collaboración institucional, son una señal clara de la nuestra implicación col territoriu, la industria y los trabayadores”, aseguró Prada, que recuerda que l’ERE de Vesuvius ye una consecuencia directa de la reforma llaboral del añu 2012 “que dexa a empreses con beneficios tomar estes decisiones ensin falta d’autorización alministrativa previa”.

   Icono gráfico alusivo al tipo de archivo Audiu (Audiu: 624 Kb) (n'español)

Información sobre el documento

© Copyright 2006. Gobiernu del Principau d'Asturies