Gobiernu del Principau d'Asturies

Asturies, muncho más cerca

Tas en

Asturias.es Temes Industria y enerxía El Gobiernu d’Asturies presenta en Bruseleas les llinies ...
 

Industria y enerxía

El Gobiernu d’Asturies presenta en Bruseleas les llinies d’actuación p’avanzar n’una transición enerxética xusta y progresiva

El conseyeru d'Industria, la directora xeneral d'Enerxía y el director de Faen participen güei n'una xunta de la Plataforma de Rexones de Carbón en Transición. Diversificación de fontes de xeneración, reactivación y nueves actividaes empresariales figuren ente los 54 proyectos pa los que'l Principáu busca sofitu económicu de la Unión Europea

izda. dcha, Víctor Fernández, secretario del Sector Minero de UGT-Fitag; José Luis Alperi, secretario Gral. del SOMA-Fitag-UGT; Enrique Fernández, consejero de Industria, Empleo y Promoción Económica; María Belarmina Díaz Aguado, Dtora. Gral. de Energía, Minería y Reactivación; Ana Luisa Durán, presidenta de la Asociación de Comarcas Mineras Europeas Euracom; Felipe González Coto, Dtor. de Energía y Desarrollo de Negocio de Hunosa, y Juan Carlos Aguilera, Dtor. Gral. de Faen

16/10/2019

El Gobiernu d'Asturies espón güei en Bruxeles, nel marcu de la VI Xunta de la Plataforma de Rexones de Carbón en Transición, les distintes llinies de trabayu sobre los que trabaya pa promover un cambéu de modelu enerxéticu xustu y progresivu.

De cara al nuevu marcu financieru de la Unión Europea (UE), cola posibilidá de ferramientes financieres específiques pa transición enerxética, el Principáu yá presentó al traviés de la plataforma un paquete inicial de 54 proyectos n'árees como la xeotermia y los aprovechamientos d'activos mineros, la diversificación y la reactivación.

La Plataforma de Rexones de Carbón en Transición ye una iniciativa impulsada pola Comisión Europea y constituyida n'avientu de 2017. El so oxetivu ye promover mecanismos de sofitu a les rexones carboneres más afectaes pol procesu de transición escontra una economía baxa en carbonu, especialmente pol zarru de la minería. Anguaño integra a 41 territorios. Amás del Principáu, que participó en toles sesiones de trabayu, na representación española tamién tán presentes Castiella y Llión, Aragón, el Ministeriu de Transición Ecolóxica (Miteco), los sindicatos Soma-Fitag-UXT y CCOO, ACOM y Hunosa.

La delegación asturiana ta encabezada pol conseyeru d'Industria, Empléu y Promoción Económica, Enrique Fernández, xunto cola directora xeneral d'Enerxía, Minería y Reactivación, Belarmina Díaz, y el director xeneral de la Fundación Asturiana de la Enerxía (Faen), Juan Carlos Aguilera.

Na so intervención, el conseyeru repasó los trés ámbitos d'actuación del Principáu en materia de diversificación y transición enerxética y dalgunos de los proyectos que se tán desenvolviendo nesti ámbitu.

Per un sitiu, el Gobiernu d'Asturies participa na comisión entergubernamental constituyida'l pasáu llunes col Executivu central, los axentes sociales y la Federación Asturiana de Conceyos pa diagnosticar l'impactu del procesu de descarbonización ya identificar oportunidaes de futuru. Por otru, perfila col Ministeriu d'Industria, los conceyos mineros, la patronal Fade y los sindicatos sectoriales los contratos de transición xusta.

Finalmente, nel marcu européu, participa na Plataforma de Rexones de Carbón en Transición, onde se definen mecanismos de sofitu financieru y metodoloxíes d'actuación pa la puesta en marcha de proyectos específicos en rexones onde la minería del carbón tuvo un eleváu pesu económicu y nel empléu. Nesti últimu ámbitu, l'Executivu autonómicu defendió la selmana pasada énte'l Comité de les Rexones (CdR) la puesta en marcha d'un fondu específicu pa les rexones mineres que permite financiar proyectos xeneradores d'empléu y actividá y facilite la transición dende un modelu de xeneración térmicu a otru basáu en fontes anovables.

Información sobre el documento

© Copyright 2006. Gobiernu del Principau d'Asturies