Gobiernu del Principau d'Asturies

Asturies, muncho más cerca

Tas en

Asturias.es Temes Mediu Ambiente La osezna recoyida en Proaza a finales de mayu, ya recuperada, ...
 

Mediu Ambiente

La osezna recoyida en Proaza a finales de mayu, ya recuperada, va quedar en llibertá nel Parque Nacional de los Picos d’Europa

La zona foi escoyida n'analizando múltiples variantes y podría contribuyir a conectar les poblaciones oseres del oriente y l'occidente. El plantígradu, atopáu con serios problemes de salú, pasó pel Centru de la Fauna Montesa de Cantabria y dende setiembre permanez nel monte de Valsemana, en Llión

30/10/2019

La cría d'osu cantábricu recoyida a finales de mayu na redolada de la corralada de Proaza, conocida como Saba, va reintroduciser nel Parque Nacional de los Picos d'Europa nos próximos díes. El principal motivu para devolvela al mediu natural ye que s'aclimate a la so nueva redolada antes de pasar al periodu d'envernía.

Los equipos técnicos del Principáu, el Gobiernu de Cantabria y la Xunta de Castiella y Llión, col sofitu del Ministeriu pa la Transición Ecolóxica, trabayaron de forma conxunta, al traviés de protocolos comunes, y peracaben l'operativu necesariu pa la suelta del animal.

La lliberación va facese en condiciones d'estremu precuru y ensin contactu con humanos p'aumentar les posibilidaes d'éxitu de la reintroducción nel mediu natural. D'esta miente, la zona de la suelta escoyóse n'analizando múltiples variables, ente les que destaquen la disponibilidá d'alimentu y la baxa presencia de persones. Coles mesmes, el so treslláu al núcleu oriental del cordal cantábricu podría contribuyir a conectar la población osera presente nesta área, non mui numberosa, cola del occidente, muncho más estabilizada.

La osezna pasó l'últimu mes y medio nun recintu en semillibertá nel monte de Valsemana, en Llión. Nesti tiempu, siguió recuperando pesu -espérase que supere los 35-40 kilogramos- y muestra un comportamientu d'alerta y busca activa d'alimentu, polo que presenta condiciones óptimes pa dar en la fase final de tresporte y lliberación nel mediu natural. Estes instalaciones, un espaciu aislláu, ampliu y con un arriquecimientu ambiental afayadizu, facilitaron l'aclimatación del animal.

La Guardería de Mediu Natural del Principáu, en collaboración con técnicos especializaos, recoyó a la cría na alredor de la corralada osera de Proaza. Carecía desnutrición, deshidratación y alteraciones neurolóxiques y foi unviada a un centru veterinariu pa estabilizala. N'esperimentando un leve ameyoramientu, alcordóse'l so treslláu al Centru de Recuperación de la Fauna Montesa, en Cantabria, unes instalaciones específiques pal tratamientu d'osos pardos.

Mientres los trés meses que permaneció ellí, tuvo baxu control permanente y especializáu, anque ensin contactu visual colos sos cuidadores, y algamó un desenvolvimientu óptimu, hasta llegar a los 23 kilogramos de pesu. Nesi momentu, el pasáu setiembre, treslladóse al mediu natural.

Información sobre el documento

© Copyright 2006. Gobiernu del Principau d'Asturies