Gobiernu del Principau d'Asturies

Asturies, muncho más cerca

Tas en

Asturias.es El Principáu suscribe col Gobiernu central y los conceyos los ...
 

Aniciu

El Principáu suscribe col Gobiernu central y los conceyos los protocolos pa impulsar los convenios de transición xusta del Suroccidente, el Nalón y el Caudal

Los documentos, suscritos pol conseyeru d'Industria, la secretaria d'Estáu d'Enerxía y la Federación de Conceyos, establecen el procedimientu pa definir les actuaciones que se van impulsar en 16 conceyos de les trés comarques. Asturies ye la primer comunidá n'activar el procesu pa desenvolver midíes compensatories énte'l zarru de les centrales térmiques

25/03/2020

El conseyeru d'Industria, Empléu y Promoción Económica, Enrique Fernández, la secretaria d'Estáu d'Enerxía, Sara Aagesen, y los representantes de los conceyos concerníos, articulaos al traviés de la Federación Española de Conceyos y Provincies (FEMP), roblaron güei los protocolos d'actuación pa impulsar los convenios de transición xusta nel Suroccidente, la cuenca del Caudal y el valle del Nalón.

Los protocolos suscritos ente representantes de l'Alministración del Estáu, del Principáu y de los entes locales establecen el procedimientu y la metodoloxía pa ellaborar los convenios de transición xusta. El so oxetivu ye, amás, reflexar el compromisu espresu adquiríu poles distintes alministraciones.

La ellaboración de los convenios rique d'un analís estremáu per zones de les necesidaes, iniciatives y proyectos específicos, polo qu'estos protocolos refrenden l'entendimientu y alcuerdu inicial ente les alministraciones sobre la manera de proceder.

Según esplicó la secretaria d'Estáu d'Enerxía, Sara Aagesen, dende'l Ministeriu pa la Transición Ecolóxica y el Retu Demográficu (Miteco) ta trabayándose colos distintos actores pa la identificación de proyectos ya iniciatives que reactiven les zones asturianes afectaes pola transición enerxética. “Pal Gobiernu, buscar soluciones p'acompañar a Asturies nel procesu de descarbonización ye una prioridá”, sorrayó.

Aagesen incidió en que “la firma del protocolu d'actuación formaliza un compromisu común de les alministraciones implicaes pa llamar a la participación d'organizaciones empresariales y sindicales y de tolos axentes sociales”. “La participación va dotar d'un valor inestimable a los convenios, que la so firma va producise a la fin del procesu, y van ufiertar una radiografía precisa de la viabilidá ambiental, social y económica de les alternatives, porque se trata d'escoyer los meyores propuestes pal desenvolvimientu d'empléu sostenible nes zones”, amestó.

Pela so parte, pal conseyeru Enrique Fernández, "los trés protocolos suscritos ponen de manifiestu que magar la complexa situación actual, derivada de la pandemia por coronavirus COVID-19, les trés alministraciones siguimos trabayando nel diseñu de los convenios pa la so puesta en marcha lo más llueu y, d'esta manera, dar respuesta a les necesidaes de los conceyos mineros”. “Trátase, ensin dulda, d'un bon exemplu de collaboración alministrativa y de puesta de mancomún d'idees y de propuestes, teniendo en cuenta amás qu'Asturies ye la primer comunidá en suscribir estos protocolos", destacó.



La estratexa de transición xusta

En febreru de 2019, el Gobiernu central presentó'l Marcu Estratéxicu d'Enerxía y Clima, enfocáu a facilitar la descarbonización y la modernización de la economía escontra un modelu sostenible y competitivu que contribuya a poner frenu al cambéu climáticu. La Estratexa de Transición Xusta, que s'integra nesti marcu, parte de la reconocencia de los impactos negativos que, nel curtiu plazu, la descarbonización de la economía ta produciendo en determinaos territorios, con zarros d'empreses venceyaes al carbón, y la necesidá d'optimizar les resultancies de la transición enerxética en términos d'empléu.

Nesti contestu, pa sofitar a les persones y territorios afectaos, la estratexa articula la puesta en marcha de los convenios de transición xusta col fin d'ayudar a crear un nuevu texíu granible nes zones en transición y que'l so motor va ser la participación abierta y tresparente de los axentes implicaos.

Nel casu d'Asturies, los convenios van definir actuaciones en 16 conceyos venceyaos a la minería del carbón y afectaos pol zarru de centrales térmiques: nel suroccidente (Tinéu, Cangas, Ibias y Degaña), nel Caudal (Ayer, L.lena, Mieres, Morcín, La Ribera y Riosa) y nel Nalón (Llangréu, Llaviana, Samartín del Rei Aurelio, Sobrescobiu, Casu y Bimenes).

Les actuaciones previstes pal Suroccidente propónense apangar los impactos de los zarros de la central térmica de Soutu y de les esplotaciones mineres de la zona. Pela so parte, les del valle del Nalón y del valle del Caudal tán concebíes pa desaniciar los efectos de los zarros de la térmica de Lada y de la minería nos conceyos afectaos.

A la espera de concretar los proyectos, les iniciatives van xirar alredor a la rehabilitación de zones mineres degradaes, l'aprovechamientu d'activos mineros y el fomentu d'iniciatives empresariales de desenvolvimientu. L'oxetivu ye doble: per un sitiu, refacer territorios degradaos pola actividá minera; per otru, xenerar actividá económica alternativa y promover la recolocación d'escedentes de la minería del carbón.


Icono gráfico alusivo al tipo de archivo Audiu (Audiu: 841 Kb) (n'español)

Información sobre el documento

© Copyright 2006. Gobiernu del Principau d'Asturies