Gobierno del Principado de Asturias

Asturias, mucho más cerca

Estás en

Aniciu Temes Investigación La ciencia asturiana capta 7,8 millones de fondos nacionales pa ...
 

Investigación

La ciencia asturiana capta 7,8 millones de fondos nacionales pa financiar 54 proyectos d’ investigación

La Universidad d’Uviéu, l’Ispa, centros del CSIC y el Serida ameyoren el resultáu y llogren dos millones más que l’añu anterior nes convocatorias d’ I+D+i. El conseyeru Borja Sánchez destaca’l l potencial de la comunidá n’esti ámbitu y la necesidá de siguir medrando

18/06/2020

La ciencia asturiana llogró captar más de 7,8 millones nes últimes convocatories nacionales d'I+D+i. El Ministeriu de Ciencia ya Innovación va financiar 54 proyectos, con una duración envalorada d'ente 3 y 4 años, d'equipos d'investigación d'entidaes públiques que tomen toles árees de conocencia.

La resolución provisional de les convocatories de 2019 qu'acaba de publicar l'Axencia Estatal d'Investigación evidencia una meyora de la competitividá de les propuestes de la comunidá, que reciben casi 2 millones más que na edición anterior.

La Universidá d'Uviéu ye la institución que llogra más recursos, con 44 proyectos y 4,8 millones. Sígen-y dos organismos públicos d'investigación del Centru Superior d'Investigaciones Científiques (CSIC) n'Asturies: l'Institutu de Productos Lácteos (Ipla) y l'Institutu del Carbón (Incar), con iniciatives que sumen más de 700.000 euros. Tamién llograron resultaos satisfactories l'Institutu d'Investigación Sanitaria del Principáu (Ispa-Finba) y el Serviciu d'Investigación y Desenvolvimientu Agroalimentariu (Serida), con dos proyectos cercanos a los 400.000 euros.

Los estudios d'investigación universitaria con financiación nacional distribúyense por toles árees de conocencia. Asina, les inxenieríes capten daqué más de 1,3 millones, siguíes polos proyectos del área química, que reciben un millón. El restu d'ámbitos como bioloxía, ciencies, humanidaes, informática, psicoloxía o economía cunten con un volume de financiación que supera los 100.000 euros.

Amás de les propuestes d'equipos investigadores, tamién se resolvió la convocatoria de retos de collaboración, destinada a financiar proyectos en collaboración cola empresa. Nesti casu, Asturies espunta con dos iniciatives coles que consiguió casi dos millones y nes que participen la Fundación pa la Investigación y la Innovación Biosanitaria (Finba) y l'empresa Entrechem, en collaboración con otres dos fundaciones sanitaries y el Centru Tecnolóxicu de la Informacion y la Comunicación (CTIC).

El conseyeru de Ciencia, Innovación y Universidá, Borja Sánchez, considera qu'estos resultaos ponen de relieve “el potencial científicu de la comunidá” que, al so xuiciu, “tien de siguir creciendo col sofitu de les instituciones públiques”. Sánchez destaca la medra nos fondos captaos y la importancia de xenerar conocimientu en toles árees.

El Ministeriu de Ciencia, Innovación y Universidaes destina 360 millones a proyectos presentaos por universidaes, centros públicos d'I+D+i, centros privaos, entidaes ensin ánimu d'arriquecimientu y centros tecnolóxicos venceyaos a la ciencia, la tecnoloxía y la innovación. Asturies tien anguaño 150 proyectos en desenvolvimientu con financiación nacional, a los que se van sumar estos 54 programes, en siendo definitiva la resolución.

Información sobre el documento

© Copyright 2006. Gobierno del Principado de Asturias