Gobiernu del Principau d'Asturies

Asturies, muncho más cerca

Tas en

Asturias.es El proyectu de llei sobro perros d'asistencia garantiza la ...
 

Aniciu

El proyectu de llei sobro perros d'asistencia garantiza la entrada de les persones con discapacidá y los sos canes na mayoría d'espacios con llende d'accesu p'animales

“Queremos favorecer l’accesibilidá y la movilidá porque toos tenemos los mismos derechos”, asegura la conseyera Melania Álvarez

15/10/2020

El proyectu de llei sobre perros d'asistencia garantiza la entrada d'estos canes, lo mesmo que de les persones con discapacidá a les qu'acompañen, na mayoría d'espacios con llimitación d'accesu p'animales.

El testu, qu'anguaño ta en tramitación na Xunta Xeneral, define la figura de les unidaes de vinculación, entendíes como la unidá funcional que formen la persona y el so perru d'asistencia.

L'aprobación de la llei va garantizar l'accesu a les persones con discapacidá y los sos perros a diversos espacios, yá seyan de titularidá pública o privada. Ente ellos atopen los tresportes, los llugares d'espardimientu al campu, incluyíos parques, xardinos y sableres en cualesquier periodu del añu; y los centros y dependencies oficiales, mesmo que los xudiciales y de participación política y electoral. L'accesu tamién va ser llibre a los establecimientos de venta d'alimentos y de restauración, los agospiamientos turísticos y les instalaciones deportives, incluyíes les piscines, hasta'l marxe de la zona d'agua. Amás, va permitíse-yos la entrada a centros d'enseñanza, sanitarios, asistenciales y de servicios sociales, xunto coles residencies, llares y clubes pa l'atención de persones, y aquellos espacios dedicaos al cultu relixosu.

Queda prohibida la entrada a determinaos espacios singulares, como quirófanos, zones d'establecimientos de restauración onde se manipolien alimentos o que seyan d'usu esclusivu del personal, l'agua de les piscines y l'interior de los parques d'atracciones.

La conseyera de Derechos Sociales y Bienestar, Melania Álvarez, compareció güei na Xunta Xeneral pa informar sobre'l proyectu de llei y valoró el procesu participativu qu'implicó a entidaes públiques y privaes na definición de la norma. “Queremos favorecer l'accesibilidá y movilidá de les persones con discapacidá, mesmo que facilita-yos la posibilidá de vivir de manera independiente y de participar dafechu na sociedá n'igualdá de condiciones, porque toles persones tenemos los mesmos derechos”, aseguró.

La norma reconoz el papel relevante de los perros d'asistencia na sociedá, mesmo que la obligación que tienen les persones adiestradores y propietaries d'empresta-yos los cuidaos necesarios. Amás, clasifica los diversos tipos de canes d'asistencia, un llistáu que podría ampliase nel futuru si se demuestren resultaos positivos en terapies específiques.

Los perros d'asistencia qu'apaecen reconocíos na normativa son los siguientes:

  • Guía: adomaos pa conducir a les persones con discapacidá visual.
  • Señal d'alerta de soníos: preparaos p'avisar a les persones con discapacidá auditiva.
  • De serviciu: fueron entrenaos pa ufiertar sofitu n'actividaes de la vida diaria a una persona con discapacidá.
  • D'alerta médicu: formaos p'avisar en casu de que la persona a la qu'acompañen sufra una crisis de desconexón sensorial, como son les epiléptiques y les diabétiques.
  • Pa persones con trestornu del espectru autista: adomaos pa promover l'autonomía por aciu l'ayuda nes actividaes de la vida diaria.
  • De cualesquier otra clase que pueda reconocese por decretu del Conseyu de Gobiernu cuando tenga constancia de que l'ensayamientu en nueves variantes d'asistencia llogró resultaos positivos.

Información sobre el documento

© Copyright 2006. Gobiernu del Principau d'Asturies