Gobiernu del Principau d'Asturies

Asturies, muncho más cerca

Tas en

Asturias.es Muyeres L’Institutu de la Muyer entama la segunda fase del cursu sobre ...
 

Muyeres

L’Institutu de la Muyer entama la segunda fase del cursu sobre igualdá nel ámbitu llaboral, empobináu a representantes sindicales

L’actividá, desenvuelta en collaboración con UXT y CC. OO. , consta de cuatro sesiones que se van celebrar hasta’l 15 de mayu. La formación ta orientada a los axentes implicaos na negociación colectiva y forma parte de los alcuerdos de concertación social

Un momento del actu

23/04/2019

La Conseyería de Presidencia y Participación Ciudadana, al traviés del Institutu Asturianu de la Muyer y Polítiques de Mocedá, empezó güei la segunda fase del cursu Igualdá y negociación colectiva, dirixíu a representantes sindicales implicaos directamente nestos procesos. La formación, desenvuelta en collaboración con UXT y CC. OO., va impartise en cuatro sesiones hasta’l 15 de mayu y tien como oxetivu ameyorar los conocimientos prácticos pa la ellaboración de los planes d’igualdá de les empreses y de los protocolos contra l’acosu sexual.

El taller enmárcase nel alcuerdu pa la competitividá económica y la sostenibilidá social soscritu pol Principáu y los axentes sociales y da continuidá a la primer fase, empezada’l pasáu añu dientro de la Estratexa asturiana contra la resquiebra salarial. Les acciones formatives inclúyense nel Pactu d’Estáu contra la Violencia de Xéneru y el Pactu Social contra la Violencia sobre les Muyeres del Principáu.

El cursu tien calter prácticu, p’aplicar los conocimientos adquiríos primero sobre la igualdá nel ámbitu llaboral. Nesti contestu, los planes y protocolos contra l’acosu por razón de sexu y la participación de la representación llegal de los trabayadores resulten imprescindibles.

L’actividá va desenvolvese en cuatro sesiones de trés hores a les que van asistir un máximu de 20 persones por cada organización sindical. Nes dos primeres xornaes (23 d’abril y 7 de mayu) va tratase’l procesu d’ellaboración, desenvolvimientu, siguimientu y evaluación de los planes d’igualdá y va cuntase cola presencia de la esperta na materia María José Carretero, de la Fundación Muyeres.

La tercer sesión, prevista pal 14 de mayu, va tar abierta al públicu y va tratar sobre l’acosu sexual nel mundu llaboral. Trés ponentes de relevancia nacional van esplicar los protocolos y les secueles que carecen les víctimes: Raquel Gómez Merayo, socióloga y miembru de la Secretaría Confederal de Muyeres y Igualdá de CC. OO.; Elisa García Rodríguez, graduada social y responsable del departamentu de Muyer d’UXT confederal, y Ángeles Sepúlveda, médica forense y ex-directora de Violencia de Xéneru de la Xunta d’Andalucía.

P’acabar, el 15 de mayu’l cursu va zarrase con una sesión técnica onde se va tratar el próximu conveniu de la Organización Internacional del Trabayu (OIT) sobre la violencia sexista nel ámbitu llaboral.

El Principáu y los axentes sociales coinciden na necesidá de siguir trabayando pola igualdá y reforzar la capacitación nesta materia a la hora de negociar los convenios colectivos, unos instrumentos claves na llucha contra la discriminación llaboral y la resquiebra salarial de xéneru.

 

Información sobre el documento

© Copyright 2006. Gobiernu del Principau d'Asturies