Gobiernu del Principau d'Asturies

Asturies, muncho más cerca

Tas en

Asturias.es El Principáu busca families pa que los menores acoyíos en ...
 

Aniciu

El Principáu busca families pa que los menores acoyíos en centros de protección crezan nun entornu familiar

La Conseyería de Servicios Sociales y la Fundación Meniños presenten la campaña añal destinada a promover los acoyimientos permanentes

14/05/2018

El Gobiernu d'Asturies busca families pa que los menores acoyíos en centros residenciales de protección crezan nun entornu familiar, de manera temporal o permanente. A finales de 2017, 543 menores alcontrábense nesta situación nel Principáu, de los que 476 permanecíen al cargu de los sos propios familiares (familia estensa) y 67 en llares ensin llazu de parentescu.

La conseyera de Servicios y Derechos Sociales, Pilar Varela, presentó güei, xunto cola directora de la Fundación Meniños, Mónica Permuy, la campaña añal Búsquense abrazos, que desenvuelve la entidá pa promover esti tipu de protección. Meniños collabora dende l'añu 2000 col Principáu col propósitu de promover y xestionar los acoyimientos permanentes pa neños mayores de seis años, grupos d'hermanos que convien que permanezan xuntos, menores de minoríes étniques o aquellos con dalgún tipu d'enfermedá o discapacidá.

La campaña va cuntar en 2018 cola participación del deportista de trail- running, Antonio Madriñán. El mozu gallego-asturianu, que collabora dende va años cola fundación, va sofitar esta iniciativa nes sos redes sociales y va tomar parte n'una carrera solidaria que se va celebrar tres el branu col fin de promocionar esti programa.

Varela animó a la ciudadanía a solicitar información sobro los programes d'acoyimientu y estimó l'arrogancia de les families que dieron esi pasu, especialmente nel casu de los permanentes, al tratase de neños con mayores dificultaes. Anguaño, esti programa da sofitu a 13 menores que viven acoyíos por 11 families.

Les persones interesaes pueden solicitar información nel teléfonu 900907052 y na páxina www.acogimientoyadopciónasturias.org.

Nel actu participaron tamién la directora del Institutu Asturianu d'Atención Integral a la Infancia, Ana Farpón, y el responsable de la fundación n'Asturies, Carlos Sáez.

 

 

Información sobre el documento

© Copyright 2006. Gobiernu del Principau d'Asturies