Gobiernu del Principau d'Asturies

Asturies, muncho más cerca

Tas en

Asturias.es Temes Consumu El Gobiernu d'Asturies formaliza la propuesta pa que la cultura ...
 

Consumu

El Gobiernu d'Asturies formaliza la propuesta pa que la cultura sidrera s’incluya na llista de candidatures a patrimoniu de la humanidá

El Principáu unvia al Ministeriu de Cultura la documentación técnica que xustifica la presentación de la opción énte la Unesco. L'espediente reflexa la condición de la sidra como iconu de la comunidá asturiana y destaca el gran respaldu social que llogró la iniciativa

18/07/2019

El Gobiernu d'Asturies unvió al Ministeriu de Cultura la documentación xustificativa de la propuesta de la cultura sidrera asturiana para la so inclusión na llista representativa de la Unesco, que daría pasu a la posibilidá de ser declarada patrimoniu cultural inmaterial de la humanidá.

El Principáu completa d'esta miente la fase técnica del procesu que desenvolvió a lo llargo del últimu añu'l comité director para la ellaboración de la candidatura, dirixíu poles conseyeríes d'Educación y Cultura y Desenvolvimientu Rural, y sofitáu polos responsables de la Denominación d'Orixe Protexida (DOP) Sidra de Asturias.

Nel comité participaron antropólogos, historiadores, especialistes nel mundu de la madera y técnicos de l'Alministración que supieron condesar la idiosincracia, el simbolismu y la pluralidá de la cultura sidrera.

Na documentación técnica unviada al Ministeriu de Cultura, que ta adaptada a les especificaciones de la Unesco, descríbese refechamente la cultura sidrera asturiana y faise fincapié nos sos elementos constitutivos, les sos traces identitaries y la so especificidá. L'espediente inclúi un vídeu y un dosier fotográficu de gran calidá que capten de forma sintética y representativa la esencia de la cultura sidrera, de cara a esplicar la so orixinalidá y relevancia.

El documentu inclúi tol procesu d'ellaboración de la sidra, dende'l plantíu de pumares al embotellado, la posterior comercialización y el consumu domésticu, amás d'esplicar cómo na cultura sidrera combínase lo comuñal, lo lúdico y festivo, la celebración o les formes de socialización.

El trabayu esplica que la sidra configura una cultura inmaterial xenuina, na que tienen cabida manifestaciones artístiques (música, pintura, lliteratura…) colos sos propios rituales y normes internes escrites y non escrites.



Respaldu social y participación popular

El documentu, que considera la sidra “ún de los principales iconos d'Asturies”, incide nel gran respaldu social que la candidatura llogró concitar nel Principáu y l'intensu procesu de participación ciudadana qu'acompañó a la preparación de la propuesta.

Gracies a el llabor de 181 embaxadores de la sidra, xestionáronse llibros de firmes nos que se recoyeron los testimonios de sofitu de 17.697 persones, a los qu'hai que sumar 2.465 adhesiones al traviés de la páxina web abierta para espublizar la propuesta. Nes redes sociales habilitaes pal sofitu de la candidatura rexistró hasta xunu cerca de 2.000 siguidores, con más de 20.000 interacciones.

A esti respaldu popular súmase'l sofitu de diverses instituciones, como la Universidá d'Uviéu o la Federación Asturiana de Conceyos, y la concesión a la cultura sidrera del Moscón d'Oru 2019, otorgáu pola Asociación Amigos de Grau.

Tres la entrega al Ministeriu de Cultura de la documentación técnica ábrese un nuevu procesu, supeditáu a l'apertura per parte de la Unesco d'un plazu por qu'España pueda presentar nueves candidatures a patrimoniu cultural inmaterial de la humanidá.

Na actualidá ta evaluándose la candidatura de los Caballos del Vinu de Caravaca de la Cruz, en Murcia, y desconozse entá cuándo podrá presentase per parte d'España una nueva propuesta. Nel momentu en que s’ábra esa posibilidá, la cultura sidrera asturiana va tener que competir con iniciatives procedentes d'otres comunidaes autónomes. La decisión sobre la fecha de la candidatura asturiana ye potestá del Conseyu del Patrimoniu Históricu Español.

 

Información sobre el documento

© Copyright 2006. Gobiernu del Principau d'Asturies