Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies regula por decretu'l conteníu de la ...
 

Aniciu

El Gobiernu d'Asturies regula por decretu'l conteníu de la historia clínica dixital y les condiciones d'usu per parte de los profesionales

La norma, que va entrar llueu en vigor y afecta mesmo a la sanidá pública como a la privada, ameyora la protección de los datos de los pacientes

23/06/2019

El Gobiernu del Principáu aprobó esta selmana un decretu qu'ameyora la protección de los datos clínicos de los pacientes y aumenta la seguridá de los profesionales nel exerciciu de les sos responsabilidaes. Trátase d'una normativa que regula per primer vegada n'Asturies l'usu de la historia y la documentación clínica de les persones, concretando'l conteníu de los mesmos, especificando los distintos usos d'estos documentos, y de forma bien especial estableciendo los supuestos, les condiciones, les llendes d'usu, accesu y cesión d'estos datos médicos acordies con la normativa vixente.

Esta norma, que llueu se va publicar nel Boletín Oficial del Principáu d'Asturies, afecta mesmo a la sanidá pública como a la privada y fixa con claridá los conteníos que tien d'incluyir la documentación clínica previniendo frente a lo que ye innecesario incorporar nes histories médiques. Regula coles mesmes les condiciones d'accesu a esta información, con total respetu a la intimidá de les persones y la protección de los pacientes nel so derechu a la confidencialidá de tolo rellacionao col so procesu d'enfermedá o cola so estancia nun centru sanitariu.

El decretu define la historia clínica como'l conxuntu de documentos que contienen los datos, valoraciones ya informaciones de cualesquier índole sobre la situación y la evolución clínica d'un paciente a lo llargo del procesu asistencial. La so función principal ye facilitar l'asistencia sanitaria, dexando constancia de toos aquellos datos que, so criteriu médicu, permitan la conocencia veraz y actualizao del estáu de salú, ensin perxuiciu de los usos previstos con fines xudiciales, epidemiolóxicos, de salú pública, d'investigación o de docencia.

Especifica que tien d'haber una única historia por paciente, procurar la máxima integración posible de la documentación que la constitúi, siguir un orde secuencial de los procesos d'asistencia y, con independencia del soporte, garantizar la confidencialidá de los datos del paciente, explicitar l'autoría del conteníu, la so seguridá, el so correctu caltenimientu y la so reproducción segura.

Esta regulación tamién esplica cómo s'ha rellenar esta documentación clínica, el conteníu obligatoriu, otra documentación necesaria como'l diagnósticu y el tratamientu o les pruebes d'imaxes, l'usu de la historia clínica resumida, los módulos d'especial custodia, y la existencia d'un Comité Director de Siguimientu de la Historia Clínica.



Protección de los datos sanitarios

ÚN de los apartaos más relevantes del decretu refierse al accesu a los datos y les llendes nel usu y l'accesu a estos documentos. Nesti ámbitu esplicítase que “los datos incorporaos a les histories clíniques son confidenciales y toa persona que tenga accesu a la información y a la documentación clínica queda suxeta al deber de secretu. Los accesos van quedar llindaos puramente a los fines específicos qu'en cada casu se xustifica”.

Ente ellos, destaquen l'accesu a la historia clínica con fines xudiciales, epidemiolóxicos, salú pública, investigación o de docencia, lo mesmo que d’alministración y xestión, inspección, evaluación, acreditación y planificación, y per parte del paciente.

El decretu regula tamién cómo ha ser y cómo se debe xestionar otra documentación clínica como son los informes d'alta, los d'urxencies, los certificaos médicos, y otra documentación rellacionada cola salú de los pacientes. La xestión, custodia y caltenimientu de la documentación clínica, inclusive tres el fallecimientu del paciente, abórdase na última parte de la norma.

 

   Icono gráfico alusivo al tipo de archivo Audiu (Audiu: 693 Kb) (n'español)

Información sobre el documento

© Copyright 2006. Gobiernu del Principau d'Asturies