Gobiernu del Principau d'Asturies

Asturies, muncho más cerca

Tas en

Asturias.es Temes Xusticia El Gobiernu d’Asturies y los colexos d’abogaos y procuradores ...
 

Xusticia

El Gobiernu d’Asturies y los colexos d’abogaos y procuradores alcuerden un reglamentu nuevu pa l’asistencia xurídica gratuita

Incorpora 15 baremos indemnizatorios y adapta la prestación d’esti derechu a los cambeos llegales y de procedimientu. El conseyeru de Presidencia destaca que “ameyora y afita un derechu que la so garantía ye una prioridá pal Principáu”. La comunidá ye la quinta con más inversión nesta materia y la primera ente les autonomíes uniprovinciales

Un momento de la reunión

25/02/2019

El Gobiernu d’Asturies y los colexos d’abogaos y procuradores alcordaron un reglamentu nuevu d’asistencia xurídica gratuita onde dambes partes trabayaron na comisión mista constituyida nel 2018. El borrador definitivu incorpora, ente otres midíes, 15 baremos indemnizatorios nuevos y adapta la prestación d’esti derechu a los cambeos llegales y de procedimientu alministrativu.

El conseyeru de Presidencia y Participación Ciudadana, Guillermo Martínez, que presidió güei la xunta de la comisión, destacó que la normativa nueva “ameyora y afita la prestación d’un derechu reconocíu pola Constitución Española, que la so garantía ye una prioridá pal Gobiernu del Principáu”. Nesti sentíu, destacó l’esfuerciu presupuestariu cada vez más grande que’l so departamentu realizó nesta materia, cola incorporación de meyores nos procedimientos de tramitación y d’axilidá nos abonos a los colexos profesionales.

Esti compromisu asitia a Asturies como la quinta comunidá con mayor inversión en xusticia gratuita por habitante nel periodu 2005-2017, depués de Cataluña, Canaries, Madrid y el País Vascu, y la primera ente les autonomíes uniprovinciales. Nel 2018, el Principáu destinó 5,8 millones a dar cobertura xurídica a persones con pocos recursos.

El borrador del reglamentu nuevu, que la so tramitación alministrativa va empezar de manera inmediata, recueye les modificaciones de la Llei d’Asistencia Xurídica Gratuita incorporaes pola Llei 42/2015, de 5 d’ochobre, de reforma de la Llei 1/2000 d’Enxuiciamientu Civil, y los cambeos de la Llei Orgánica 13/2015, de modificación de la Llei d’Enxuiciamientu Criminal. El testu, que va sustituyir a la normativa en vigor dende’l 2007, figura ente los compromisos de llexislatura de la Conseyería de Presidencia y Participación Ciudadana y estructúrase en 6 títulos y 3 anexos, que recueyen los formularios de solicitú y los distintos baremos económicos como base pal cálculu de les subvenciones colexales pola prestación del serviciu d’asistencia xurídica gratuita.



Novedaes principales

Ente les novedaes qu’incorpora, destaca la equiparación de les cuantíes de les guardies por asistencia a víctimes de violencia de xéneru coles d’atención a persones deteníes o preses, amás de la creación de 15 baremos indemnizatorios nuevos: 12 correspondientes a los servicios d’abogaos y 3 pa los que dan los procuradores.

Ente los baremos nuevos que van percibir los colexos d’abogaos inclúyese la creación d’un turnu específicu pa la orientación xurídica, defensa y asistencia lletrada inmediata a persones víctimes de trata y terrorismu, amás de pa menores d’edá o persones con discapacidá intelectual o enfermedá mental víctimes d’abusu o maltratu.

Tamién se prevé un conceptu nuevu pa los procedimientos abreviaos énte l’Audiencia Provincial y una retribución por asistencia a la comparecencia en prisión o solicitú de midíes cautelares penales. Amás, reconócense indemnizaciones pola tramitación de midíes cautelares civiles y pola presentación de recursos; la cobertura económica pola solicitú d’anulación de sentencia dictada en rebeldía y pola prestación de recursos estraordinarios por infracción procesal énte’l Tribunal Superior de Xusticia.

Al respective de los colexos de procuradores, contémplase un baremu nuevu pa la retribución de los procedimientos con tribunal del xuráu, la reconocencia de prestaciones pola tramitación d’execuciones penales y civiles, y la cobertura económica pola preparación de recursos de casación. Amás, los profesionales van tener derechu a percibir dietes por desplazamientu en cuantía asemeyada a les abonaes a los abogaos.

El reglamentu establez que los baremos van actualizase nos mesmos términos qu’hasta agora; quier dicise, nos porcentaxes de medría de les retribuciones del personal funcionario de l’Alministración del Principáu, que p’anguaño ta afitada nel 3 %. Amás, a partir d’agora va poder publicase cada añu la llista colos importes actualizaos de les indemnizaciones por asistencia xurídica gratuita.

Xunto a los supuestos indemnizatorios nuevos, el borrador aprobáu güei incorpora cambeos nel procedimientu y al respective del mesmu funcionamientu internu del órganu. Asina, actualícense los miembros que formen parte de la comisión y habilítase la posibilidá de crear una o delles delegaciones o grupos de trabayu si’l volume d’asuntos en tramitación lo xustifica.

Al respective de los procedimientos pa la reconocencia del derechu a l’asistencia xurídica gratuita, inclúyese l’usu de medios d’averiguación y de comunicación telemáticos, y establécense los mecanismos necesarios pa garantizar, de manera automática, l’asistencia lletrada nos órdenes xurisdiccionales social y penal.

 

Información sobre el documento

© Copyright 2006. Gobiernu del Principau d'Asturies