Gobiernu del Principau d'Asturies

Asturies, muncho más cerca

Tas en

Asturias.es L’esbardu lliberáu en payares nos Picos d'Europa evoluciona con ...
 

Aniciu

L’esbardu lliberáu en payares nos Picos d'Europa evoluciona con normalidá

El primer contactu visual col animal dende la so suelta dexa reparar el so bon aspectu asina como la so adaptación al mediu. El trabayu conxuntu d'Asturies, Cantabria y Castiella y Llión, en collaboración col Gobiernu central, contribuyó a actualizar los protocolos d'actuación, aplicables en casos similares

14/01/2020

La cría d'osu cantábricu reintroducida en payares nel Parque Nacional de los Picos d'Europa ta aclimatándose al so entornu nuevu con normalidá. Pela primer vez dende esa fecha púdose establecer contactu visual col exemplar, lo que dexó comprobar que presenta un bon aspectu.

Dende'l momentu de la so suelta realizóse un siguimientu por parte del personal del Gobiernu del Principáu, la Xunta de Castiella y Llión y del propiu parque. Esti trabayu confirmó que l'animal alternó periodos d'inactividá, nos que tuvo abellugáu, con otros nos que andaba a la busca d'alimentu. Confirmóse tamién la presencia de dos exemplares subadultos d'osu pardu nes proximidaes.

La lliberación de la osa realizóse en condiciones d'estremu precuru y ensin contactu con humanos p'aumentar les posibilidaes d'éxitu de la so reintroducción nel mediu natural. La zona de la suelta foi escoyida depués d’analizar múltiples variables, ente otres, la disponibilidá d'alimentu y la baxa presencia de persones. Asina mesmo, el so treslláu al nucleu oriental del cordal cantábricu puede contribuyir a conectar la población osera d'esta área, non mui numberosa, cola del occidente, muncho más estabilizada.

La Guardería de Mediu Natural del Principáu, en collaboración con técnicos especializaos, recoyó a la cría na redoma de la corralada osera de Proaza a finales de mayu de 2019. Carecía desnutrición, deshidratación y alteraciones neurolóxiques y foi unviada a un centru veterinariu pa estabilizala. Depués d’esperimentar un ameyoramientu leve, alcordóse'l so treslláu al Centru de Recuperación de la Fauna Montesa, en Cantabria, unes instalaciones específiques pal tratamientu d'esta especie.

Mientres los trés meses que permaneció ellí, tuvo baxu control permanente y especializáu, anque ensin contactu visual colos sos cuidadores, y algamó un desenvolvimientu óptimu, hasta llegar a los 23 quilogramos en setiembre. Nesi momentu, foi treslladada al recintu de Valsemana, espaciu en semillibertá, aislláu y con un arriquecimientu ambiental afayadizu, como pasu previu al so reintroducción nel mediu natural a empiezos de payares.

Les alministraciones d'Asturies, Cantabria, Castiella y Llión y el Ministeriu pa la Transición Ecolóxica caltuvieron una collaboración intensa y constante en tol procesu, lo qu'ayudó a actualizar los protocolos de rehabilitación, sedación, radiomarcaxe, treslláu y lliberación de críes d'osu pardu, daqué de gran utilidá énte otros casos similares.

   Icono gráfico alusivo al tipo de archivo Audiu (Audiu: 500 Kb) (n'español)

Información sobre el documento

© Copyright 2006. Gobiernu del Principau d'Asturies