Gobiernu del Principau d'Asturies

Asturies, muncho más cerca

Tas en

Asturias.es Families El bancu de lleche materno del HUCA fixo posible alimentar a 180 ...
 

Families

El bancu de lleche materno del HUCA fixo posible alimentar a 180 bebés prematuros de magar s’abrió en xineru del 2017

La unidá recibió 680 llitros procedentes de 123 madres donantes nos sos primeros quince meses. El Gobiernu d’Asturies agradez l’arrogancia y l’esfuerciu de les muyeres que participen nesta iniciativa. Mañana celébrase’l Día Mundial de la Donación de Lleche Humano

18/05/2019

El bancu de lleche materno del Hospital Universitariu Central d’Asturies (HUCA) dexó alimentar a 180 neños ingresaos nel centru dende la so puesta en marcha en xineru del 2017. Los más de los beneficiarios son neños prematuros que nun puen recibir esti alimentu de les sos propies madres, pero l’oxetivu ye que pueda valir pa otros menores ingresaos. Pa eso, la Conseyería de Sanidá anima a les muyeres que puedan donar lleche a que se pongan en contactu con esti serviciu nel teléfonu 985652456.

Pola mor del Día Mundial de la Donación de Lleche Humano, que se celebra mañana, el Gobiernu del Principáu agradez a toles persones que participaron nesta iniciativa la so arrogancia y el so esfuerciu, que dexó hasta agora recibir y procesar 680 llitros procedentes de 123 madres donantes.

Esti alimentu, desque pasteurizao pa menguar al máximu’l riesgu de tresmisión d’infecciones, úsase pa naciellos, sobre manera grandes prematuros o neños enfermos, que les sos madres nun pueden da-yos abondo.

Esti tipu d’alimentación supón munches ventayes nutricionales frente a la lleche artificial, promueve’l desenvolvimientu sensorial y cognitivu, protexe de patoloxíes infeccioses y cróniques y amenorga la mortalidá infantil por enfermedaes como la diarrea o la neumonía. Por estes razones, la Organización Mundial de la Salú (OMS) aconseya la lactancia materna de forma esclusiva nos primeros seis meses de vida y complementao con otros alimentos, polo menos, hasta los dos años. Amás, esti sistema favorez la salú y el bienestar de la madre, ayuda a espaciar los embaranzos, mengua’l riesgu de cáncer ováricu y mamariu, aumenta los recursos de la familia y resulta inocua pal mediu ambiente.



Amenorgamientu de riesgos

Los bancos de lleche materno son unidaes especializaes que la so finalidá ye promocionar la lactancia natural, sofitar a les madres que dan de mamar a los sos fíos y menguar los riesgos inherentes a l’alimentación artificial en neños hospitalizaos. Esti serviciu del HUCA coordínase con otros hospitales de la rede pública pa facilitar l’accesu a esti alimentu a neños prematuros d’otres árees sanitaries.

La Conseyería de Sanidá cunta con un equipu de profesionales ampliu pa promover l’alimentación natural con campañes sistemátiques y collabora anualmente na celebración de la Selmana Mundial de la Lactancia Materna.

La OMS sorraya que’l meyor alimentu pa un naciellu ye la lleche de so ma. Si esto nun ye posible, l’alimentu donao ye l’alternativa meyor pa neños enfermos o prematuros porque se tolera meyor, protexe a los naciellos enfermos contra problemes intestinales graves como la enterocolitis y mengua’l riesgu d’infección de la qu’aumenta les sos posibilidaes de recuperación, supervivencia y desenvolvimientu.

Pue tenese más información nesti enllaz: https://bit.ly/2VH4YaG

 

Información sobre el documento

© Copyright 2006. Gobiernu del Principau d'Asturies