Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes El Principáu aprueba la convocatoria d'ayudes de los fondos ...
 

Agricultura y montes

El Principáu aprueba la convocatoria d'ayudes de los fondos Leader pal desenvolvimientu rural con un presupuestu de 16,3 millones

Esti añu caltiénense les llinies d'ésitu ya incorpórase l'apueste pol sector agroalimentariu. La cuantía del ticket rural aumenta un 40% y los proyectos d'inversión van poder recibir hasta 300.000 euros

05/06/2020

El Conseyu de Gobiernu aprobó la convocatoria d'ayudes de los fondos Leader de desenvolvimientu rural, con un presupuestu tresañal, hasta 2022, de 16.347.900 euros. Esta partida, ampliable n'otros 10.150.500 euros, va distribuyise de la siguiente manera: 5.497.900 euros pa esti añu, 5.607.000 pal próximu y 5.243.000 pa 2022.

Estes subvenciones, cofinanciaes pol Fondu Européu Agrariu de Desenvolvimientu Rural (Feader), dan soporte al texíu granible y social del mediu rural y garanticen la continuidá de l'actividá nun sector esencial pal suministru d'alimentos a la población.

La convocatoria añal, qu'inclúi un cambéu de les bases reguladores, establez un nuevu marcu, nel que se plantega un enfoque integral del desenvolvimientu rural, caltiénense les llinies d'éxitu ya incorpórase l'apueste pol sector agroalimentario. Ente otres midíes, van simplificase los trámites alministrativos y van flexibilizase les condiciones p'aportar a les subvenciones. D'esta miente, dase respuesta a les necesidaes plantegaes a partir de la esperiencia d'años anteriores.

Tamién va aumentar un 40% la cuantía de l'ayuda p'autónomos, el conocíu ticket rural, dende los 25.000 euros actuales hasta los 35.000. Per otra parte, los proyectos d'inversión van poder recibir hasta 300.000 euros.

De la mesma, ábrese una nueva llinia d'ayudes pa la industria agroalimentaria, qu'aspira a ser un pilar de la estratexa de desenvolvimientu pa esti sector, alredor de la marca de calidá de Alimentos del Paraísu Natural.

Los cambeos introducíos van permitir impulsar proyectos nel turismu rural, la industria agroalimentaria, la hostelería o'l pequeñu comerciu, destinaos a adaptase al nuevu escenariu de la COVID-19, lo qu'implica la execución d'inversiones pa dotase de medios de protección o otres venceyaes al impulsu d'estratexes de comercialización y comunicación dixitales, como la vienta online.

Les ayudes, que se conceden al traviés de los once grupos de desenvolvimientu rural que tomen la práctica totalidá del territoriu asturianu, tán dirixíes a apoyar proyectos d'entidaes locales, ensin ánimu d'arriquecimientu y empreses privaes.

La distribución de los 16.347.900 euros polos grupos de desenvolvimientu rural ye la siguiente:

GRUPU TOTAL CONVOCATORIA (euros)
Camín Real de La Mesa 1.654.500
Ese-Entecabos 2.137.900
Adicap 731.000
Baxu Nalón 1.233.500
Comarca de la Sidra 1.289.500
Altu Nalón 1.133.500
Altu Narcea Muniel.los 1.375.000
Montaña Central 1.689.000
Ozcos-Eo 964.000
Oriente 2.100.000
Navia-Porcía 2.040.000
TOTAL 16.347.900

 

El conseyeru de Desenvolvimientu Rural, Agroganadería y Pesca, Alejandro Calvo, que güei s'axuntó con representantes de la Rede Asturiana de Desenvolvimientu Rural (Reader), destacó que los cambeos nes bases fortalecen les llinies d'éxsitu de les convocatories anteriores ya introducen midíes con un fuerte apueste pol sector agroalimentariu.

Coles mesmes, resaltó que los cambeos plantegáronse acordies con Reader y los grupos d'acción local, colos que se trabayó de forma consensuada, yá que son los meyor asitiaos pa detectar el talentu y les oportunidaes de emprendimiento nel territoriu.

Información sobre el documento

© Copyright 2006. Gobiernu del Principau d'Asturies