Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos El to Conceyu El Gobiernu d'Asturies caltien los ingresos fiscales de los ...
 

El to Conceyu

El Gobiernu d'Asturies caltien los ingresos fiscales de los conceyos a pesar de la moratoria nel pagu de tributos cedíos

El Principáu recuerda al PP que nengún conceyu pierde recursos, yá que se-yos sigue ingresando la cantidá relativa a los impuestos locales que xestiona l'Alministración autonómica. L'Executivu sofita que los consistorios puedan utilizar el so superávit para facer frente a la emerxencia sanitaria

28/04/2020

El Gobiernu d'Asturies caltién l'abonu a los conceyos d'aquellos ingresos provenientes de los impuestos locales que xestiona al traviés del Ente Públicu de Servicios Tributarios a pesar de la moratoria que pesa sobre tolos tributos que xestiona'l Principáu.

Poro, y contra lo que vieno dando a entender el Partíu Popular (PP), los conceyos que tienen cedíos los sos tributos o una parte d'ellos en nengún casu tán perdiendo ingresos nin los van perder nel futuru. Ye l'Alministración autonómica la qu'asume'l costu, adelantando a los conceyos unos ingresos que nun ta percibiendo de los contribuyentes.

Cuestión distinta ye que los conceyos, como'l restu de les alministraciones públiques, vean amenorgaos los sos ingresos pola mesma coyuntura económica o de resultes de les sos decisiones en relación con posibles moratories nel pagu de tases municipales, una materia sobre la que tienen plena autonomía.

El Principáu tomó dos decisiones tributaries nes primeres selmanes tres la declaración del estáu d'alarma. El 23 de marzu suspendieron los plazos acomuñaos a los tributos que xestiona l'Alministración mientres la vixencia del estáu d'alarma. Díes depués, el 8 d'abril, aprobóse'l decretu que fai posible l'aplazamientu y fraccionamientu, por un plazu máximu de 6 meses y ensin intereses, de les deldes tributaries de trabayadores autónomos, pymes y microempreses que se vieren obligaes a paralizar la so actividá.

Per otru llau, el Gobiernu d'Asturies sofita dafechu la posibilidá de que los conceyos pueden utilizar el superávit con vistes a encarar los daños de la emerxencia sanitaria derivada de la COVID-19. El Principáu caltién esta postura inclusive dende primero que se produxera la pandemia. Sicasí, l'Executivu asturianu recuerda que la decisión de permitir l'usu d'esti remanente ye potestá esclusiva del Estáu, non de la comunidá autónoma, cuestión que, distintes formaciones de la oposición –y, de nuevo, el Partíu Popular- tendríen de conocer. Una vegada más, el PP llega tarde a una reivindicación que yá se punxo sobre la mesa nel gobiernu de Mariano Rajoy, tanto per parte de los conceyos como pelal del mesmu Principáu.


Icono gráfico alusivo al tipo de archivo Audiu (Audiu: 922 Kb) (n'español)

Información sobre el documento

© Copyright 2006. Gobiernu del Principau d'Asturies