Gobiernu del Principau d'Asturies

Asturies, muncho más cerca

Tas en

Asturias.es La epidemia de gripe mengua na sesta selmana, con 329 casos per ...
 

Aniciu

La epidemia de gripe mengua na sesta selmana, con 329 casos per cien mil habitantes

El descensu afecta por igual a toles edaes, sacante nel grupu de 15 a 64 años, nel que se caltién. Les hospitalizaciones amenorguen, pero la mayoría de los ingresos siguen presentando dalgún factor de riesgu y nun tán vacunaos

13/02/2020

La epidemia del gripe mengua na sesta selmana del añu y asitia en 329 casos por cien mil habitantes. La situación continua siendo d'intensidá baxa per tercer selmana consecutiva y la remisión detéctase en toles edaes, sacante nel grupu de 15 a 64 años, nel que se caltién.

Según los datos facilitaos pola Rede de Médicos Centinela d'Asturies, el virus gripal predominante ye l'A, anque empieza a incrementase la circulación del B, daqué habitual na fase de descensu de la onda epidémica.

Ente'l 3 y el 9 d'esti mes viose un amenorgamientu de los ingresos y de los casos graves. L’HUCA, como hospital centinela d'Asturies, rexistró 333 hospitalizaciones, de les cualos 138 fueron graves. Nel conxuntu de la comunidá, los ingresos xuben a 1.024 y tanto estos como les afectaciones de mayor importancia presentaben dalgún factor de riesgu y nun taben vacunaos.

Los datos nacionales reflexen que la incidencia del gripe ye decreciente o estable en toles comunidaes sacante en Canaries, Comunidá Valenciana y Ceuta, onde sigue n'ascensu. Estremadura ye la única rexón con un nivel d'intensidá basal.



Vacunación y encamientos

Hasta'l 9 de febreru vacunáronse n'Asturies 207.378 persones, 5.564 más que na campaña anterior.

Llavar de manera frecuente les manes con agua y xabón, asina como caltener una bona ventilación de los espacios zarraos son les midíes preventives más eficaces pa evitar les andaes.

En casu de tusir o espirriar hai qu’usar pañuelos de papel d’un solu usu pa tapar la boca y la nariz, o bien el buecu del coldu pa evitar contaminar les manes. Amás, suxerse llimpiar con frecuencia les superficies que se toquen coles manes como los pomos de les puertes, interruptores, etc…

Los síntomes del gripe son malestar xeneral, una fiebre alta súbita y tos, que se trata con antitérmicos. Les autoridaes sanitaries insisten en que los antibióticos nun curen el gripe.

Información sobre el documento

© Copyright 2006. Gobiernu del Principau d'Asturies