Gobiernu del Principau d'Asturies

Asturies, muncho más cerca

Tas en

Asturias.es Temes Turismu El Costa Verde Express llega a Asturies pa conmemorar el 30 ...
 

Turismu

El Costa Verde Express llega a Asturies pa conmemorar el 30 aniversariu de la marca turística España Verde

Profesionales de medios de comunicación d’Australia, Italia, Suíza, Alemaña, Francia, Austria, Arxentina, México y Estaos Uníos viaxen nesi tren

la viceconseyera de Turismu, Graciela Blanco, xunto a Javier Checa, xerente de trenes turísticos de Renfe, na recepción a los periodistes internacionales que tán percorriendo la España Verde nel so 30 aniversariu

23/10/2019

La viceconseyera de Turismu, Graciela Blanco, asistió güei en Llanes al actu de recibimientu al pasaxe del tren Costa Verde Express, enantes Transcantábricu, onde viaxen una ventena de profesionales de prensa procedentes d’Austria, Italia, Suíza, Alemaña, Francia, Australia, Arxentina, México y Estaos Uníos.

El percorríu, que nel Principáu va pasar tamién per Xixón, Uviéu y Candás, entamóse nel marcu de la celebración del 30.u aniversariu de la marca España Verde, cola mira de promocionar esti sellu énte visitantes internacionales potenciales y difundir los recursos turísticos de les comunidaes del norte d’España.

La España Verde recibió alredor de 12,7 millones de visitantes l’añu pasáu, de los que más de 3,5 millones yeren estranxeros. Graciela Blanco señaló qu’un 20 % d’esos turistes internacionales escoyeron Asturies como destín. Nesti sentíu, sorrayó que’l futuru programa estratéxicu pal turismu del Principáu va apostar de cara al 2030 polos mercaos esteriores y va encontase na sostenibilidá.

España Verde ye la marca territorial llanzada en 1989 por Asturies, Galicia, Cantabria y el País Vascu cola mira d’asitiar la cornisa cantábrica como destín turísticu alternativu nel mercáu internacional. Impulsáu col sofitu de Turespaña, el sellu encara agora’l so 30.u aniversariu y aspira a reforzar la so imaxe.

Les comunidaes amparaes baxo esta marca sumen 14 reserves de la biosfera, 25 parques naturales, cuasi 2.000 quilómetros de costa y 2.800 agospedamientos rurales. Amás, los Caminos del Norte a Santiago de Compostela y la calidá de la so gastronomía son otros de los sos grandes recursos diferenciadores.



Promoción con medios de comunicación franceses

Otra manera, el vienres que vien van llegar al Principáu profesionales de cinco medios de comunicación franceses interesaos na cultura y la gastronomía asturiana.

Esti viaxe, entamáu en collaboración cola Oficina Española de Turismu de París y que tuvo yá una primer escala en Galicia, forma parte de les acciones programaes p’anguaño nel marcu del conveniu que regula’l funcionamientu de la marca España Verde.

Información sobre el documento

© Copyright 2006. Gobiernu del Principau d'Asturies