Gobiernu del Principau d'Asturies

Asturies, muncho más cerca

Tas en

Asturias.es Persones con discapacidá El Principáu adapta la información sobre violencia de xéneru pa ...
 

Persones con discapacidá

El Principáu adapta la información sobre violencia de xéneru pa facela más accesible a persones con discapacidá intelectual

L'Institutu de la Muyer trabayó cola organización Plena Inclusión pa treslladar a un sistema de llectura fácil distintos materiales sobre la lacra de les agresiones machistes

17/12/2018

La directora del Institutu Asturianu de la Muyer y Polítiques de Mocedá, Almudena Cueto, presentó güei’l trabayu El llinguaxe cenciellu na comunicación sobre violencia de xéneru, ellaboráu pola Asociación Plena Inclusión, mediante’l cual afixéronse al sistema de llectura fácil los materiales informativos sobre agresiones machistes, cola mira de facelos más accesibles a persones con discapacidá intelectual, mayores o que nun dominen l'español.

El Principáu pretende con esti trabayu facilitar a la ciudadanía la detección y denuncia d'esti tipu de fechos y favorecer, amás, la conocencia de los protocolos d'actuación qu'esisten n'Asturies p'atender a les víctimes.

Pa ello, l'Executivu collaboró con Plena Inclusión, que representa nel Principáu a les persones con discapacidá intelectual o del desenvolvimientu y a les sos families, p'adaptar el documentu informativu sobre'l Pactu Social contra la Violencia sobre les Muyeres y el cartelu y dípticu esplicativos sobre les sos diverses tipoloxíes. Amás, ellaboráronse dos vídeos: unu sobre'l procesu de validación que se sigue p'adaptar un documentu de violencia de xéneru a llectura fácil y otru centráu nes pautes pa interactuar con persones con discapacidá intelectual.

Los materiales van distribuyise al traviés de los recursos del Protocolu Interdepartamental contra la Violencia de Xéneru del Principáu (centros asesores de la muyer servicios sociales, servicios sanitarios, cuerpos y fuerces de seguridá del Estáu...) y va collaborase coles entidaes qu'atienden a persones con esta tipoloxía de discapacidá.

Según la Encuesta de Discapacidá, Autonomía Personal y Situaciones de Dependencia (EDAD) ellaborada pol Institutu Nacional d'Estadística anguaño, hai 2,31 millones de muyeres con discapacidá n'España. Pela so parte, la Macroencuesta sobre Violencia de Xéneru del 2015 recueye que les muyeres que sufren discapacidá nun nivel igual o superior al 33 % declaren carecer violencia física o sexual. Les barreres de toa mena a les que tienen d'enfrentase enzanquen qu'esti colectivu pueda dexar atrás situaciones de maltratu con facilidá.

L'Institutu Asturianu de la Muyer impulsó'l trabayu presentáu güei cola mira de trabayar con iniciatives como la llectura fácil y la llectura con apoyos visuales o pictogrames pa garantizar a estes muyeres un accesu a la información como ciudadanes de plenu derechu.

La llectura fácil ye un métodu d'adaptación y redacción de materiales qu'averar la información y la cultura a persones con dificultaes de comprensión por unu o otru motivu. Trátase de presentar testos claros y fáciles d'entender.

 

Descargar noticia (pdf: 175 Kb)

Descargue gratis el programa Acrobat Reader

Información sobre el documento

© Copyright 2006. Gobiernu del Principau d'Asturies