Gobiernu del Principau d'Asturies

Asturies, muncho más cerca

Tas en

Asturias.es Vivir n'Asturies Muévete per Asturies L’Asociación Asturies conBici considera al HUCA entidá amigable ...
 

Muévete per Asturies

L’Asociación Asturies conBici considera al HUCA entidá amigable colos ciclistes

• Reconoz l’esfuerciu del Gobiernu del Principáu por ameyorar l’accesibilidá en bicicleta al centru hospitalariu cola instalación d’aparcamientos especiales y el diseñu de rutes amañoses

26/07/2015

Asturies conBici, l’asociación de ciclistes urbanos y cicloturistes más representativa del Principáu, valoró la instalación d’aparcamientos especiales pa esti mediu de tresporte n’Hospital Universitariu Central d’Asturies (HUCA) y el diseñu de rutes amañoses p’aportar al complexu sanitariu como los motivos principales pa reconocelu como entidá bici-amiga, un títulu col que se reconoz a les entidaes amigables con esta actividá por favorecer y impulsar l’usu de la bicicleta.

Esti nomamientu ye’l resultáu d’un trabayu de collaboración ente Asturies conBici y la Conseyería de Sanidá, que s’allargó dellos meses pa consiguir que l’HUCA nuevu seya un sitiu afayadizu pa la bicicleta.

Les llinies d’actuación foron básicamente dos: la instalación d’aparcamientos especiales y el diseñu de rutes amañoses p’aportar al hospital en combinación con otros medios de tresporte públicos.

Gracies a esta collaboración, la Conseyería de Sanidá instaló delles zones d’aparcamientu cubiertes, a la vista del públicu y señalizaes cola indicación S-17 d’estacionamientu. Dos d’elles asítiense na entrada d’hospitalización, una delantre de la cafetería y otra na cera d’enfrente, xunto al ascensor d’accesu al parking motorizáu; una más atópase na zona n’urxencies, al llau del ascensor d’accesu al parking motorizáu; otres dos allúguense na zona de docencia, y trés más, nes entraes de consultes esternes, pediatría y rehabilitación, respectivamente. A tenor del so usu, la dirección del centru va poder ampliar estos aparcamientos si fore menester.

Amás, Asturies ConBici coordinó un trabayu comunitariu empobináu a diseñar cuatro rutes p’ameyorar l’accesibilidá en bicicleta al HUCA dende les estaciones de tren d’Uría y La Corredoria.

 

Más información en: http://www.asturiesconbici.org/index.php/ciclismo-urbano-oviedo/1317-h

Información sobre el documento

© Copyright 2006. Gobiernu del Principau d'Asturies