Gobiernu del Principau d'Asturies

Asturies, muncho más cerca

Tas en

Asturias.es Temes Turismu El Gobiernu d’Asturies y nueve conceyos celebren el Día Européu ...
 

Turismu

El Gobiernu d’Asturies y nueve conceyos celebren el Día Européu del Camín de Santiago

La convocatoria de la federación europea que xestiona les rutes xacobees partió del Executivu autonómicu y van secundala rexones y llugares de cinco países. El Principáu va ser la comunidá europea que más eventos entame pola mor de la conmemoración, del 18 al 20 d’esti mes

De izqda. a dcha.: la consejera Berta Piñán; el concejal de Cultura de Valdés, Ismael González; el alcalde de Valdés, Óscar Pérez, y el director general de Cultura y Patrimonio, Martín López-Vega

11/10/2019

El Gobiernu d’Asturies, al traviés de la Conseyería de Cultura, Política Llingüística y Turismu, auspicia la celebración del Día Européu del Camín de Santiago los díes 18, 19 y 20 d’esti mes. Nueve conceyos asturianos, dalgunos d’ellos en collaboración col Principáu, sumáronse a la iniciativa europea.

La conseyera Berta Piñán presentó esta mañana la programación d’esti eventu en L.luarca, acompañada pol director xeneral de Cultura y Patrimoniu, Martín López-Vega, y l’alcalde de Valdés, Óscar Pérez.

El Camín de Santiago foi’l primer Itinerariu Cultural Européu declaráu como tal pol Conseyu Européu, en 1987, y les sos rutes principales, les d’España y Francia, incluyéronse na Llista del Patrimoniu Mundial de la Unesco, de manera socesiva, en 1993, 1999 y 2015, añu esti postreru en que s’incorporaron los Caminos de Santiago del Norte, nos que s’integren les rutes xacobees asturianes.

Anguaño, a propuesta del Gobiernu d’Asturies, la Federación Europea, l’organismu encargáu de xestionar estos caminos en cuantes que son Itinerariu Cultural Européu, decidió convocar el Día Européu del Camín de Santiago.

La celebración va ser secundada en rexones y localidaes de cinco países: España, Portugal, Francia, Holanda y Polonia. El Principáu ye la comunidá que más actividaes entama, con 24. Portugal y Polonia programaron 12, Holanda, 6, Francia, 3 y Galicia, 2.

N’Asturies, nueve conceyos sumáronse a la conmemoración: Xixón, Uviéu, Avilés, Cuideiru, Villaviciosa, Valdés, Castrillón, Ribeseya y Tinéu. La programación incluye dende itinerarios guiaos per tramos urbanos o rurales del Camín de Santiago, hasta xornaes de llimpieza ciudadana de tramos concretos. Va haber tamién visites guiaes a monumentos del Camín de Santiago nos que s’amuesa la vinculación del patrimoniu cola ruta y charles informatives.



Exa cultural

Piñán destacó la importancia qu’esti día européu tien p’Asturies y pa les comunidaes y llugares que la secunden n’España y Europa, porque ayuda a divulgar la idea del Camín de Santiago como exa cultural qu’articula a delles rexones del continente y contribuye a dinamizar los territorios al so pasu.

Amás, manifestó que dexa a Asturies garrar una posición de lideratu nun proyectu européu con estensión a cinco países, y añedió que, d’esta manera, dase cumplimientu al oxetivu qu’apaez nel Llibru Blancu del Camín de Santiago del Principáu d’Asturies “de favorecer la presencia de les nuestres rutes xacobees nes grandes exes culturales europees”.

Piñán tamién resaltó qu’esta iniciativa fai posible celebrar n’Asturies a lo llargo d’una fin de selmana una ventena d’actos en nueve conceyos, lo que calificó de “daqué insólito hasta la fecha en cuantes al Camín de Santiago asturianu”.

Finalmente, la conseyera consideró que la celebración supón un apueste por introducir acciones medioambientales na promoción cultural, con actividaes, como les de Xixón y Valdés, que tienen por oxetu realizar tramos del Camín de Santiago al empar que se llimpien.

   Icono gráfico alusivo al tipo de archivo Cartel (Pdf: 2 Mb) (n'español)
   Icono gráfico alusivo al tipo de archivo Folleto (Pdf: 6 Mb) (n'español)

Información sobre el documento

© Copyright 2006. Gobiernu del Principau d'Asturies