Gobiernu del Principau d'Asturies

Asturies, muncho más cerca

Tas en

Asturias.es El Gobiernu del Principáu facilita la presencia de trés empreses ...
 

Aniciu

El Gobiernu del Principáu facilita la presencia de trés empreses biotecnolóxiques asturianes nel mayor alcuentru européu del sector

Dreamgenics, Entrechem y Microviable Therapeutics participen na Bio-Europe 2019 d’Hamburgo, la conferencia continental más importante nel área de ciencies de la vida

12/11/2019

El Centru Européu d’Empreses y Innovación (CEEI) y la Sociedá de Promoción Esterior del Principáu d’Asturies (Asturex) sofitaron la participación de trés empreses biotecnolóxiques asturianes en Bio Europe 2019, la XXV edición de la conferencia continental más importante nel área de ciencies de la vida y que pon en contactu a compañíes d’esti sector y del farmacéuticu con inversores interesaos.

Les compañíes que se treslladaron al eventu que se celebra n’Hamburgo son Dreamgenics, Entrechem y Microviable Therapeutics, que van tener hasta mañana dellos alcuentros billaterales con veceros y inversores potenciales, amás de conocer les últimes novedaes del sector y asistir a les conferencies y paneles previstos.

Esta ye la tercer actividá na que collaboraron el CEEI y Asturex a lo llargo d’anguaño, depués d’entamar la participación d’empreses del sector TIC asturianu na Feria 4 Years from Now (4YFN) celebrada en febreru nel marcu del Mobile World Congress de Barcelona y de startups tecnolóxiques na Feria South Summit celebrada en Madrid n’ochobre.

La visita a Bio_Europe 2019 enmárcase dientro de les actividaes de promoción internacional financiaes por Asturex y empobinaes a empreses tecnolóxiques y startups nueves. Na so edición anterior recibió más de 4.300 visitantes de 2.325 compañíes procedentes de 60 países y facilitó la celebración de más de 26.000 reuniones billaterales.

La participación empresarial rexonal concrétase nestes compañíes:

  • Dreamgenics, que desenvuelve servicios y productos adaptaos a la práctica clínica y a la realización d’estudios d’investigación, concretamente servicios de bioinformática, DG Reports (solicitú de visualización de resultaos d’análisis xenómicos), HD Genome One (solución de software p’análisis xenómicu), diagnósticu molecular, consultoría en bioinformática y collaboración en proyectos d’investigación.
  • Entrechem, que desenvuelve entidaes químiques bioactives nueves provinientes de productos naturales microbianos. Xenera derivaos nuevos por biosíntesis combinatoria de les rutes metabóliques correspondientes, identifica les molécules más prometedores y avanza’l so desenvolvimientu preclínicu hasta’l puntu de demostrar eficacia in vivo.
  • Microviable Therapeutics desenvuelve tecnoloxíes pa normalizar y caltener microbiotes (microorganismos) intestinales saludables. La so actividá xira alredor de trés pegollos: un sistema de recoyida de muestres de fieces anaeróbiques (GutAlive), un procedimientu pa obtener microbiota y una formulación propia pal almacenamientu al plazu llargu de microbiota en condiciones viables.

Información sobre el documento

© Copyright 2006. Gobiernu del Principau d'Asturies