Gobiernu del Principau d'Asturies

Asturies, muncho más cerca

Tas en

Asturias.es Temes Deportes El Principáu autoriza los entrenamientos con midíes pa la ...
 

Deportes

El Principáu autoriza los entrenamientos con midíes pa la práctica segura del deporte base n’edá escolar y aplaza l’entamu de les competiciones

Les instrucciones busquen minimizar los riesgos de la covid-19 y permiten facer exerciciu saludable a menores d’ente 3 y 16 años. Los Xuegos Deportivos y les pruebes qu’organizan les federaciones pospónense pola evolución de la pandemia

22/09/2020

La Conseyería de Cultura, Política Llingüística y Turismu publicó una resolución que delimita la práctica del deporte base n'edá escolar nun escenariu de máximu nivel de seguridá posible, col fin de minimizar los riesgos de la covid-19.

Asina, les midíes, de calter preventivu y organizativu, dexen entrenar y facer exerciciu nuna entornu favorable y seguru a neños, neñes y mocedá d'enseñanza Infantil, Primaria y Secundaria (de 3 a 16 años). L'entamu de les competiciones, sicasí, queda paráu n’espera de la evolución de la pandemia nel Principáu.

Los colexos ya institutos van poder ufiertar actividaes deportives siempre que se cumplan les normes conteníes na resolución nueva y na de la Conseyería d'Educación del 2 de setiembre, qu'afita los protocolos pa les extraescolares.

D'esta miente, los Xuegos Deportivos Escolares y les competiciones entamaes poles federaciones o promovíes por entidaes deportives pal cursu escolar y la temporada 2020-2021, van tener qu'esperar énte la evolución de la pandemia y van depender de les decisiones qu'adopten les autoridaes sanitaries autonómiques.

Les midíes del resolvimientu tán empobinaes a establecer un escenariu que “favoreza la práctica deportiva saludable y la ocupación activa del ociu, y que faiga posible los entrenamientos en condiciones de seguridá”.

Nel contestu de los Xuegos Deportivos, la gran competición del deporte base asturianu qu'entama'l Principáu, los neños, neñes y mocedá que s'inscriba va tomar parte n'entrenamientos entamaos y dirixíos dende les escueles deportives de los centros educativos, de los conceyos y de los clubes. Estes práctiques de calter non competitivu van desenvolvese de forma acomuñada, preferentemente por unidá o centru escolar.

Pela so parte, les federaciones deportives, al tener de referencia'l mesmu grupu poblacional, van tar suxetes a les mesmes midíes organizatives y de prevención, y tendrán de planiar la so actividá de forma coordinada cola Dirección Xeneral de Deporte, dependiente de la Conseyería de Cultura, Política Llingüística y Turismu.

Los entrenamientos y les práctiques de calter non competitivu, tantu nel ámbitu de los Xuegos Deportivos como nel federativu, tendrán de realizase ensin públicu y acordies colos protocolos aprobaos pa cada modalidá, con independencia de si son deportes de mayor, menor o nulu contactu físicu.

L’entamu de les competiciones queda suxetu al análisis de la evolución de la pandemia, conforme a los criterios sanitarios. Asina, van tomase como referencia secuencial una serie d'escenarios asociaos al calendariu escolar en función de la evolución de la crisis sanitaria.

Desque s’analice la situación en cada casu, y siempre que les condiciones sanitaries dexasen, la comisión organizadora autonómica de los Xuegos Deportivos 2020-2021 podría avanzar dende la situación autorizada por estes midíes (entrenamientos y práctiques deportives non competitives) a posibles competiciones de calter local, zonal, interzonal o autonómicu.

Esta comisión va comunicar a les federaciones y a los principales axentes collaboradores cualquier decisión que tome sobre les competiciones p'actuar d'una manera coordinada, caún dende'l so ámbitu.

Información sobre el documento

© Copyright 2006. Gobiernu del Principau d'Asturies