Gobiernu del Principau d'Asturies

Asturies, muncho más cerca

Tas en

Asturias.es La campaña contra l’aviespa asiática, que coordina el Principáu, ...
 

Aniciu

La campaña contra l’aviespa asiática, que coordina el Principáu, duplica los sos efectivos

El Centru d'Alerta y Control d'Especies Invasores de La Mata (Grau) monitorizará los trabayos de les distintes alministraciones y entidaes implicaes. ente les novedaes d'anguaño destaca l'usu de técniques más eficientes y menos invasives. Mediu Natural empecipió los trabayos pa esaniciar el plumeru de la pampa y el control d'especies invasores con altu impactu, como'l visón americanu y el mapache

15/07/2020

La campaña de retirada y neutralización de niales de l'aviespa asiática, que coordina'l Principáu, dobló'l personal disponible al respective de 2019. Va estendese hasta'l 31 d'avientu y al aumentu de los efectivos del Gobiernu asturianu súmase los de les entidaes collaboradores.

El Centru d'Alerta y Control d'Especies Invasores d'El Matu, en Grau, va ser l'encargáu de centralizar y monitorizar los trabayos, lo mesmo que de coordinar a tol personal implicáu de la Dirección Xeneral de Mediu Natural y Planificación Rural, del Serviciu d'Emerxencies del Principáu d'Asturies (Bomberos d'Asturies) y de les entidaes locales, como son los bomberos municipales, Protección Civil y empreses contrataes.

La principal novedá de la campaña de retirada de niales d'anguaño va ser l'usu de nueves técniques y metodoloxíes. Sobre la base de la esperiencia y asesoramientu científico-técnicu, añediéronse a los métodos d'aplicación de biocida y detonación con cartuchos la neutralización por aciu llanzamientu de pequeños proyectiles trescalaos con insecticida, al traviés d'equipos d'aire estruyíu. Esti métodu, más rápidu y económicu, resulta menos invasivu que l'aplicación de biocida y va permitir atender de forma más eficiente los avisos que se rexistren na plataforma www.avisap.es .

Toes estes cuestiones fueron analizaes na xunta celebrada esta mañana pol comité asesor del plan d'actuación pa la detección y control de la vespa velutina.



Otres especies invasores

El plan de llucha contra especies exótiques invasores tamién busca la erradicación d'otres que tienen importantes efectos negativos mesmo pa la biodiversidá como pa les producciones agroalimentaries y sobre la salú de les persones. El Principáu destina anguaño más de 700.000 euros a esti fin.

Una d'estes especies ye'l plumeru de la pampa (cortaderia selloana). La campaña d'anguaño va centrase especialmente naquelles árees de mayores valores ambientales, como son los parques naturales, reserves, cursos fluviales, etc. Nestos trabayos van utilizase técniques avalaes pola Universidá d'Uviéu y va cuntase cola collaboración activa de la Viceconseyería d'Infraestructures, Movilidá y Territoriu.

Amás, la Dirección Xeneral del Mediu Natural contempla, per primer vegada, actuaciones de control sobre otres especies exótiques como'l visón americanu (Neovison vison) y el mapache (Procyon lotor), que causen un importante impactu negativu sobre la biodiversidá nos ecosistemes nos que s'establecen.

La presencia d'estos animales afecta a les densidaes d'otros carnívoros autóctonos como'l turón, mesmo qu’a potenciales preses (falcatrúa, anfibios, peces). Amás, puede tresmitir enfermedaes como la aleutiana del visón (ADV), aniciada por un parvovirus, el moquiellu y otres patoloxíes al restu de carnívoros qu'habiten nos sotos fluviales, incidiendo de forma directa sobre la población piscícola.

Pa estos trabayos, va siguise puramente'l protocolu d'actuación y la metodoloxía de trabayu establecíos na Estratexa de Xestión, Control y Erradicación del Visón Americanu n'España.


Icono gráfico alusivo al tipo de archivo Audiu (Audiu: 645 Kb) (n'español)

Información sobre el documento

© Copyright 2006. Gobiernu del Principau d'Asturies