Gobierno del Principado de Asturias

Asturias, mucho más cerca

Estás en

Aniciu El Gobiernu d’Asturies prepara la primer convocatoria d’ayudes a ...
 

Aniciu

El Gobiernu d’Asturies prepara la primer convocatoria d’ayudes a proyectos de investigación relacionados coles víctimes de la guerra civil y la dictadura

La iniciativa, que va cuntar con una partida de 25. 000 euros, va permitir financiar estudios sobre fontes documentales y testimonios orales y la organización d'acciones de sensibilización y promoción de la memoria histórica. El conseyeru de Presidencia sorraya na Xunta Xeneral qu'el “firme compromisu” del Principáu nesta materia oldea cola falta de sensibilidá” del Executivu central, que nun dedicó “un solu euru” a cumplir les obligaciones derivaes de la llei

20/04/2017

El Gobiernu d'Asturies prepara la primer convocatoria de subvenciones y ayudes a proyectos d'investigación rellacionaos coles víctimes de la guerra civil y la dictadura. La iniciativa, que va cuntar con una partida de 25.000 euros, va permitir financiar estudios sobre fontes documentales y testimonios orales y la organización d'acciones de sensibilización y promoción de la memoria histórica n'Asturies.

Asina lo anunció güei el conseyeru de Presidencia y Participación Ciudadana, Guillermo Martínez, nel plenu de la Xunta Xeneral del Principáu, onde recordó qu'esta ye una de les trés acciones más significatives que figuren na axenda de los próximos meses del Executivu autonómicu p'avanzar nel cumplimientu de los sos compromisos nesta materia.

Les otres dos son la continuidá de los trabayos de la comisión d'espertos encargaos de la ellaboración del catálogu autonómicu de buelgues y muertes y la firma d'un conveniu de collaboración, por importe de 25.000 euros, cola Universidá d'Uviéu pa l'actualización del mapa de fueses comunes y la base de datos de víctimes. L'últimu catálogu, de 2010, identificó un total de 343 enterramientos distribuyíos en 55 conceyos.

Tal que sorrayó'l conseyeru, estes actuaciones reflexen “el firme compromisu del Gobiernu del Principáu con los que fueron víctimes de la guerra civil y de la represión franquista, y colos sos familiares”. Un compromisu, añedió, qu'oldea “cola nula voluntá política y la falta de sensibilidá del Gobiernu d'España”, que dende 2013 nun dedicó un solu euru a la memoria histórica y al cumplimientu de les obligaciones derivaes de la llei.

 

Collaboración municipal

Al respective de la ellaboración d'un catálogu autonómicu de muertes franquistes, la Dirección Xeneral de Xusticia ya Interior solicitó la collaboración de los conceyos pa la localización d'esti tipu de símbolos. Hasta agora, 62 unviaron la información, lo que supón que cerca del 80 per cientu de les corporaciones locales collaboraron nos trabayos iniciales d'identificación.

El conseyeru destacó, sicasí, que 16 conceyos entá nun ufiertaron nenguna contestación, polo que se-yos va reclamar otra vez la información, a instancies de la Federación Asturiana de Conceyos, “pues, al tratase d'un catálogu autonómicu ye indispensable cuntar colos datos de tolos conceyos”, indicó.

L'oxetivu del catálogu ye avanzar na retirada de símbolos franquistes (escudos, insinies, plaques o oxetos qu'aponderen la sublevación militar, la guerra civil o la represión de la dictadura), sacantes alleguen delles circunstancies escepcionales.

Una vegada que'l Principáu disponga de la información de tolos conceyos, la comisión d'espertos va emitir un informe nel que va constar si los símbolos y güelles identificaes disponen de dalgún tipu de significáu históricu y arquitectónicu, valor artísticu o relixosu, y va informar de la so importancia estructural pa los inmuebles onde s'alluguen.

P'arriquecer los trabayos de los espertos, la intención del Executivu rexonal ye percanciar les aportaciones y suxerencies de les asociaciones, colectivos y particulares venceyaos cola recuperación de la memoria histórica, articulando les correspondientes canales de interlocución y participación pa poner de mancomún les meyores que los técnicos vaigan algamando.

Información sobre el documento

© Copyright 2006. Gobierno del Principado de Asturias