Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Programa de Desenvolvimientu Rural (FEADER) El Principáu aumenta un 32 % los fondos Leader y simplifica la ...
 

Programa de Desenvolvimientu Rural (FEADER)

El Principáu aumenta un 32 % los fondos Leader y simplifica la xestión pa impulsar el desenvolvimientu del mediu rural

La convocatoria d’anguaño cunta con un presupuestu plurianual de más de 16,3 millones, ampliable n’otros 10,1. El ticket rural aumenta un 40 % y los proyectos d’inversión van poder recibir hasta 300.000 euros

07/07/2020

El conseyeru de Mediu Rural y Cohesión Territorial, Alejandro Calvo, destacó güei l’apueste del Gobiernu d’Asturies polos fondos Leader y les meyores na convocatoria d’anguaño pa que se puedan xestionar con mayor axilidá y favorezan la creación d’empléu y el desenvolvimientu económicu nel mediu rural.

Calvo, que clausuró l’asamblea xeneral de la Rede Asturiana de Desenvolvimientu Rural, recordó que’l financiamientu aumentó nun 32 % y el presupuestu plurianual algama yá los 16,3 millones, ampliables n’otros 10,1 millones.

Al respective de les novedaes na convocatoria, señaló que’l marcu nuevu caltién les llinies d’éxitu de convocatories anteriores y incorpora l’apueste pol sector agroalimentariu. Asina, pa dar respuesta a necesidaes surdíes a partir de la esperiencia d’años anteriores, simplificáronse los trámites alministrativos y flexibilizáronse les condiciones p’acceder a les subvenciones.

Amás aumenta nun 40 % la cantidá de l’ayuda p’autónomos, el conocíu ticket rural, dende los 25.000 euros actuales hasta los 35.000, y los proyectos d’inversión van poder recibir hasta 300.000 euros.

Tamién s’abre una llinia nueva pa la industria agroalimentaria, qu’aspira a ser un pegollu de la estratexa de desenvolvimientu pa esti sector, alredor de la marca de calidá Alimentos del Paraísu Natural.

Los cambeos introducíos van dexar impulsar proyectos nel turismu rural, la industria agroalimentaria, la hostelería o’l comerciu pequeñu, con sofitos destinaos tamién a afacese al escenariu nuevu de la COVID-19, con execución d’inversiones pa dotase de medios de protección o otros vinculaos al impulsu d’estratexes de comercialización y comunicación dixitales, como la venta online.

Los fondos Leader son subvenciones cofinanciaes pol Fondu Européu Agrariu de Desenvolvimientu Rural (Feader) que dan soporte al texíu productivo y social del mediu rural. Concédense al traviés de los once grupos de desenvolvimientu rural, que garren cuasimente tol territoriu asturianu, y tán dirixíes a sofitar proyectos d’entidaes locales, ensin ánimu d’arriquecimientu y empreses privaes.


Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies