Gobierno del Principado de Asturias

Asturias, mucho más cerca

Estás en

Aniciu Temes Pesca El Principáu procede a la primer repoblación d’oricios del añu ...
 

Pesca

El Principáu procede a la primer repoblación d’oricios del añu cola suelta de más de 10.000 exemplares nel occidente

Los oricios, d’un añu d’edá y un diámetru de 10 a 25 milímetros, cultiváronse nel criaderu del Centru d’Esperimentación Marítima de Castropol. L’actuación enmárcase nel plan diseñáu pa la reparación d’esta especie en zones sobreesplotaes

06/07/2020

La Conseyería de Mediu Rural y Cohesión Territorial llevó a cabu güei la primer repoblación d’oricios (Paracentrotus lividus) del añu cola suelta de más de 10.000 exemplares xuveniles na playa de Campiel.los, en Valdés. Na seronda va facese la segunda suelta, a cargu del personal de la Dirección Xeneral de Pesca Marítima.

Los oricios, d’un añu d’edá y un tamañu de 10 a 25 milímetros de diámetru, cultiváronse nel criaderu del Centru d’Esperimentación Marítima (CEP) de Castropol.

La estracción d’estos equinodermos ta vedada dende’l 2016 tanto pa mariscadores profesionales como recreativos pola situación de la especie. De resultes d’eso, el CEP diseñó un plan de repoblación y muestreos en dellos puntos de la costa asturiana pa conocer la evolución de la especie. Amás, faise una monitorización que dexa llevar a cabu un siguimientu del asentamientu de los exemplares xuveniles y la situación nes zones repoblaes.

Les primeres reintroducciones d’oricios empezaron a realizase nel 2015 cola mira de protexer los exemplares xuveniles y hasta’l 2017 soltáronse unos 34.000 exemplares adultos nos conceyos de Valdés y Cuideiru. Nos dos últimos años, lliberáronse otros 40.000 individuos en delles zones de Castropol y Valdés. Nesti últimu conceyu realizóse güei la suelta p’axustar l’esfuerciu y llograr una densidá óptima de superficie repoblada.

Información sobre el documento

© Copyright 2006. Gobierno del Principado de Asturias