Gobiernu del Principau d'Asturies

Asturies, muncho más cerca

Tas en

Asturias.es El Principáu trabaya na ordenación racional del sector del xuegu ...
 

Aniciu

El Principáu trabaya na ordenación racional del sector del xuegu pa conciliar l’interés empresarial y la protección de los colectivos más vulnerables

El conseyeru de Presidencia destaca’l desenvolvimientu normativu autonómicu tan altu y anuncia que l’Executivu va aplicar controles nuevos d’almisión nos salones. Asturies ye la segunda comunidá con menos salones de xuegu y la única onde nun s’atoparon menores nes inspecciones realizaes anguaño

08/11/2018

El conseyeru de Presidencia y Participación Ciudadana, Guillermo Martínez, sorrayó güei na Xunta Xeneral que’l Gobiernu d’Asturies trabaya na ordenación racional y amañosa del sector del xuegu cola mira de conciliar los intereses empresariales y la protección de los colectivos vulnerables. Nesti sentíu, aportunó en que dende’l Principáu evitóse en tou momentu una medría “desordenada” de los establecimientos de xuegu presencial, daqué que sí asocedió n’otres comunidaes.

Martínez punxo como exemplu qu’Asturies ye, por númberu de salones de xuegu, la segunda comunidá con menos establecimientos d’esta clas, depués de La Rioxa, con 20, y ocupa tamién el segundu puestu en númberu de salones en comparanza cola población, con 21,26 por cada millón d’habitantes, bien lloñe de la media nacional, de 67,91.

Pa reforzar la seguranza de los usuarios, l’Executivu yá ta executando les midíes incluyíes nel Programa de Prevención de la Ludopatía 2018-2020, sobre manera l’aplicación de controles nuevos d’almisión nos salones de xuegu, pa lo que se van equiparar les condiciones d’accesu a estos locales coles que rixen pa los casinos, bingos y otros establecimientos d’esta clas. D’esta manera, Asturies va convertise na primer comunidá en disponer de los mesmos sistemes de control pa tolos establecimientos del sector.

Esta reforma va consistir na solicitú del DNI pa entrar a estos locales –una acción que yá se realiza en persones moces nel casu de dulda cola so edá- y la so estensión a tolos adultos, lo que va quitar de qu’entren quien tean inscritos nel rexistru de prohibíos. N’Asturies, 702 persones solicitaron que nun-yos dexen entrar, lo que representa una tasa de 678 por cada millón d’habitantes, inferior a la nacional, de 956 por millón.

El compromisu del Principáu cola regulación del sector reflexóse tamién na presentación d’alegaciones al decretu nacional sobre publicidá del xuegu, pendiente entá d’aprobación, cola mira de prohibir anuncios comerciales sobre esta actividá n’horarios infantiles y qu’estos se faigan por persones referentes de la mocedá y de la infancia. Tamién reclamó la supresión de bonos gratuitos pol so usu engañosu. Asturies foi, xunto a Aragón, la única comunidá que presentó alegaciones a esta normativa.

 

Llei de Xuegu y Apuestes

Na so intervención, Martínez destacó la importancia de l’aprobación, nel 2014, de la Llei de Xuegu y Apuestes, que supunxo un cambéu sustancial a la hora d’encarar la ordenación d’un sector onde conflúin intereses diversos. “Pa eso, el Gobiernu intentó conciliar los intereses empresariales col desenvolvimientu de programes de sensibilización que garanticen la protección de colectivos vulnerables y la promoción d’un ociu responsable”, añedió.

De magar entró en vigor, el Gobiernu asturianu desenvolvió más del 85 % del reglamentu previstu. Ente otres, aprobáronse midíes como la eliminación del documentu profesional pa evitar restricciones al desenvolvimientu d’esta actividá, la regulación del bingu deriváu y de les máquines de tipu C -esclusives de casinos-, la tramitación telemática de comunicaciones de treslláu, l’impulsu del Conseyu del Xuegu, la renovación del alcuerdu col Ministeriu d’Interior pal caltenimientu del Grupu d’Inspección del Xuegu, la organización de trés xornaes sobre’l xuegu responsable y la puesta en marcha del primer protocolu autonómicu de prevención del xuegu en menores y del plan de prevención de la ludopatía.

El Programa de Prevención de la Ludopatía 2018-2020, pioneru a nivel nacional y consensuáu col sector, establez una estratexa d’intervención al traviés de 5 exes, 9 llinies estratéxiques y 28 midíes, con un compromisu presupuestariu de más de mediu millón. Apurre una visión integral sobre’l xuegu y los sos efectos negativos y 20 de les sos 28 acciones, el 71 %, céntrense na sensibilización ciudadana y nos centros escolares como ferramientes fundamentales pa la prevención.

Ente les sos acciones innovadores destaquen el desenvolvimientu d’una estratexa de prevención empobinada específicamente a la población mozo pa promover una conciencia crítica contra los xuegos d’azar y los sos riesgos y pa educar, al mesmu tiempu, nel usu de les tecnoloxíes de la información. Amás, propón incluyir esti tipu d’adicciones nel plan director pa la convivencia nos centros escolares y nos conteníos curriculares, amás del desenvolvimientu del protocolu de prevención en menores, en collaboración coles empreses operadores y el Grupu d’Inspección del Xuegu.

Otra manera, como nun existen datos concluyentes en cuantes a la incidencia de la ludopatía na comunidá, particularmente sobre les adicciones vinculaes al xuegu online y a los apuestes deportivos ente la mocedá, el Gobiernu d’Asturies solicitó al Ministeriu de Sanidá l’ampliación de les muestres de la encuesta Estudes del Plan Nacional de Droga. Amás, va incluyir na Encuesta de Salú del Principáu los indicadores específicos sobre esti tipu de patoloxíes.

 

Actividá inspectora

El Grupu d’Inspección del Xuegu, creáu xunto al Ministeriu del Interior nel 2007, desenvolvió hasta l’añu pasáu un total de 5.663 inspecciones d’establecimientos autorizaos, revisó 6.701 máquines de xuegu y ellaboró 1.370 informes d’actividá y 94 actes d’inspección, amás d’otros 229 sobre xuegu non autorizáu, lo que supunxo cuasimente la desapaición de la práctica illegal. Amás, nos diez primeros meses d’anguaño realizó 407 actes d’inspección, 160 en materia de prohibíos, con cinco infracciones, y 307 en rellación con menores, ensin detectar infracción dalguna, lo que supón qu’Asturies foi la única comunidá ensin espedientes por presencia de menores en locales de xuegu nel 2018.

 

Sector del xuegu

El xuegu representó nel 2017 unos ingresos tributarios pal Principáu de 27.014.000 euros, cantidá que se caltuvo a lo llargo d’esta llexislatura: 25.027.000 vinieron de tases por xuegos de suerte, envite o azar, otros 1.718.000 del impuestu sobre’l xuegu del bingu, 226.588 por tases de xuegu sobre apuestes y 42.000 de tases sobre rifes, tómboles y combinaciones aleatories. El sector ta compuestu por un casinu en Xixón, con una sala apéndiz n’Uviéu qu’abre polo menos trés meses al añu; 6 bingos, 22 salones de xuegu, 6 locales d’apuestes, 130 empreses, 813 trabayadores y 5.401 máquines de xuegu.

 

 

Información sobre el documento

© Copyright 2006. Gobiernu del Principau d'Asturies