Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies sofita con 60.000 euros a muyeres ...
 

Aniciu

El Gobiernu d'Asturies sofita con 60.000 euros a muyeres víctimes de violencia de xéneru que tienen de camudar de localidá de residencia por un contratu de trabayu

- Les subvenciones, en réxime de concesión directa, cubren los gastos de treslláu de casa y agospiamientu, lo mesmo que de guardería y educación pa fíes y fíos menores de trés años

18/08/2019

   - Esta ye la segunda convocatoria que llanza la Conseyería d'Industria, Empléu y Promoción Económica pa dar cumplimientu a los compromisos de la concertación social

El Gobiernu d'Asturies aprobó la convocatoria d'una llinia de subvenciones dotada con 60.000 euros para facilitar la movilidá xeográfica de muyeres víctimes de violencia de xéneru que tienen de camudar de llugar de residencia por un contratu de trabayu.

Estes subvenciones otórguense en réxime de concesión directa, atendiendo al so calter singular, pol interés públicu, social y humanitariu deriváu de les particulares circunstancies nes que s'atopen les muyeres que sufrieron acosu, maltratu y la vulneración de los sos derechos fundamentales. Considérase qu'existe movilidá xeográfica cuando, de resultes d'una contratación, produzse un treslláu efectivu de la residencia habitual a una localidá de destín asitiada a más de 50 kilómetros de distancia.

Les ayudes qu'impulsa la Conseyería d'Industria, Empléu y Promoción Económica, al traviés del Serviciu Públicu d'Empléu (Sepepa), cubren los siguientes supuestos:

- Desplazamientu de la beneficiaria y de familiares al so cargu que convivan con ella, dende la localidá d'orixe a la del nuevu destín.

- Tresporte de moblame y enseres, dende la localidá d'orixe a la de destín, hasta un máximu de 4 vegaes l'Indicador Públicu de Renta d'Efectos Múltiples (Iprem) mensual vixente.

- Agospiamientu: inclúi l'arriendu o alquisición de vivienda o otros gastos d'agospiu de la beneficiaria y de familiares al so cargu na localidá de destín, nos doce primeros meses de vixencia del contratu, hasta un máximu de 10 veces el Iprem mensual vixente.

- Guardería y atención a persones dependientes: asistencia a guarderíes o centros d'enseñanza nel primer ciclu d'Educación Infantil de menores de trés años al cargu de la beneficiaria o por atención a persones dependientes, xeneraos nos doce primeros meses de vixencia del contratu. La cuantía máxima de l'ayuda va ser de 4 veces el Iprem mensual vixente.

La convocatoria toma les contrataciones realizaes nos 12 meses anteriores a la fecha de publicación nel Boletín Oficial del Principáu (Bopa) y el plazu de solicitú de les ayudes va ser de 20 díes hábiles.

Amás, los contratos tienen d'estendese, polo menos, al 50% de la xornada de trabayu a tiempu completu, según el conveniu colectivu aplicable.

Esta ye la segunda convocatoria de subvenciones de sofitu a la movilidá xeográfica de víctimes de violencia de xéneru que se lleva a cabu n'Asturies, dientro de los alcuerdos de concertación social. La primera aprobóse en 2018 y a ella presentáronse dos muyeres que recibieron ayudes superiores a los 3.000 euros.

 

Información sobre el documento

© Copyright 2006. Gobiernu del Principau d'Asturies