Gobiernu del Principau d'Asturies

Asturies, muncho más cerca

Tas en

Asturias.es El Principáu adelanta la temporada de caza de xabalín y permite ...
 

Aniciu

El Principáu adelanta la temporada de caza de xabalín y permite les batíes nos cotos rexonales dende güei

La decisión, consensuada nel senu del Conseyu de la Caza, respuende a la necesidá de controlar la población

07/08/2020

La Conseyería de Mediu Rural y Cohesión Territorial publicó güei nel Boletín Oficial del Principáu (Bopa) l'autorización del cambéu na disposición xeneral de vedes pa la temporada 2020-2021, por aciu la cual adelántase la temporada pa la caza de xabalín en cotos rexonales. Esta midida permite que, dende güei, puedan realizase batíes nos cotos qu'asina lo decidan.

La Dirección Xeneral del Mediu Natural autorizó nos últimos meses numberosos aguardos y esperes puntuales a los cotos rexonales destinaos a controlar la población de xabalinos. L'adelantu de la temporada ye una midida más nesti sentíu, que foi consensuada nel senu del Conseyu de la Caza, y que va facilitar el control de la población de suidos onde aumentó la so densidá.

Esta midida va contribuyir a apangar los efectos negativos de la medra de xabalinos, como los daños que xeneren nos cultivos, constataos al traviés de los continuos pidimientos de aguardos de les sociedaes de cazadores y les reclamaciones qu'efectúa'l sector agrícola; los peligros pa la seguridá vial, el riesgu de persistencia d'enfermedaes como la tuberculosis, o los daños a los ecosistemes por alteración d’hábitats y afección a especies d'interés.

Mediu Natural encamienta a les sociedaes qu'opten por desenvolver caceríes qu'adopten les midíes preventives habituales pa esta actividá y qu'estremen los precuros en relación cola covid-19, siguiendo les directrices y encamientos de les autoridaes sanitaries y, particularmente, aquelles específiques pa la caza, como les publicaes pola Federación Española de Caza (https://cutt.ly/2dHDsDl ).

Información sobre el documento

© Copyright 2006. Gobiernu del Principau d'Asturies