Gobiernu del Principau d'Asturies

Asturies, muncho más cerca

Tas en

Asturias.es El Principáu caltién abierta la negociación na ITV y sorraya la ...
 

Aniciu

El Principáu caltién abierta la negociación na ITV y sorraya la so disposición a algamar consensos pa menguar los tiempos d’espera

Industria propón siguir el diálogu nos meses vinientes p’analizar la viabilidá de la xornada de 35 hores

02/12/2019

El Gobiernu d’Asturies caltién abierta la mesa de negociación na empresa pública Inspección Técnica de Vehículos SA (ITVASA) y afita la so voluntá de diálogu pa estudiar meyores nel serviciu y atender los pidimientos de los trabayadores. Énte la convocatoria de cinco xornaes de paru n’avientu, la Conseyería d’Industria, Empléu y Promoción Económica quier realizar estes apreciaciones:

  • Que nun hai rotura del diálogu y la mesa de negociación sigue abierta. Ello ye que’l vienres pasáu dambes partes emplazárense a una xunta nueva pa mediaos d’avientu.
  • Que tres de l’apertura de la mesa de negociación n’ochobre yá s’algamó un prealcuerdu pa la rebaxa de la tasa de temporalidá y la medría de la plantiya en 21 persones a primeros del añu 2020, dos de los trés pidimientos sindicales.
  • Que’l conveniu colectivu que rixe anguaño n’ITVASA correspuende al de Compraventa y/o Arreglu del Automóvil, Arreglu y Venta de Motocicletes, qu’afita una xornada llaboral ordinaria máxima anual de 1.695 hores de trabayu efectiva, quier dicise, de 37,5 hores selmanales.
  • Que la consecución de la xornada de 35 hores nun ye posible anguaño ensin l’ampliación previa de la plantiya y facelo namás diba agravar los tiempos d’espera na estaciones de la empresa, perxudicando al conxuntu de la ciudadanía. Nesti sentíu, el Gobiernu propunxo caltener abierta nel 2020 la mesa de diálogu pa estudiar la viabilidá de les 35 hores.
  • Que’l Gobiernu d’Asturies tien como oxetivu un serviciu de calidá dende ITVASA y que ye sabedor del problema actual al respective de los tiempos d’espera en delles estaciones, polo que los sos esfuercios van empuestos a revertir esta situación.
  • Que la Conseyería d’Industria, Empléu y Promoción Económica afita la so postura negociadora y la disposición dafechu p’algamar un consensu que preste a toles partes y beneficie a los usuarios y usuaries. Por eso, convida a facer un esfuerzu colectivu p’averar postures qu’evite un conflictu innecesariu y inadecuáu al respective del únicu asuntu qu’entá ta abiertu.

Información sobre el documento

© Copyright 2006. Gobiernu del Principau d'Asturies