Gobierno del Principado de Asturias

Asturias, mucho más cerca

Estás en

Aniciu Pa tí Persones entamadores Crear una empresa El Principáu impulsa una comunidá rexonal en tecnoloxía aditiva ...
 

Crear una empresa

El Principáu impulsa una comunidá rexonal en tecnoloxía aditiva pa facilitar la dixitalización del texíu granible

L’Idepa entama un alcuentru sobre impresión 3D cola participación del Ministeriu d'Industria, la Universidá d'Uviéu y nueve centros y empreses innovadores. El conseyeru Enrique Fernández destaca'l compromisu del Executivu pa promover un ecosistema qu'ameyora la competitividá de la economía asturiana. “Nos hubs tenemos una de les ferramientes pa que los gobiernos seyamos más eficaces a la hora de focalizar, racionalizar y priorizar inversiones”, afirma Borja Sánchez

27/05/2020

El Principáu promueve una comunidá rexonal sobre fabricación aditiva o impresión 3D pa facilitar la digitalización del texíu granible ya impulsar sinerxes ente centros tecnolóxicos y empreses innovadores.

Con esti fin, l'Institutu de Desenvolvimientu Económicu (Idepa) entamó güei un alcuentru virtual sobre impresión 3D nel que participaron representantes del Gobiernu d'Asturies, el Ministeriu d'Industria, la Universidá d'Uviéu y nueve centros tecnolóxicos y empreses especializaes nesti campu. Una de les sos principales conclusiones ye que la comunidá constitúi un polu de referencia en fabricación aditiva y tien capacidaes, competencies ya infraestructures innovadores de primer nivel pa encabezar el desenvolvimientu de la industria 4.0.

La xornada cuntó cola participación de los conseyeros d'Industria, Empléu y Promoción Económica, Enrique Fernández, y de Ciencia, Innovación y Universidá, Borja Sánchez, y del secretariu xeneral d'Industria y Pyme del Ministeriu d'Industria, Raúl Blanco. Amás, participaron como ponentes el rector de la Universidá, Santiago García Granda, y representantes de les siguientes empreses y entidaes: Fundación Idonial, The Steel Printers, ArcelorMittal España, Triditive, Olmar, Verot, Izertis, clúster MetaIndustry y Rede Door Lab. Medio centenar d'instituciones y compañíes asturianes siguieron la sesión de trabayu online.

Enrique Fernández señaló que la impresión 3D y la dixitalización del sector industrial suponen un desafíu y una oportunidá pal texíu granible rexonal “p'ameyorar dende un puntu de vista tresversal la competitividá de la economía asturiana a nivel global”. Tamién indicó que dende l'Alministración pueden realizase aportaciones como “fomentar llugares d'alcuentru, dar sofitu financieru y contribuyir al desenvolvimientu de la cadena de valor de la fabricación aditiva”.

Pela so parte, Borja Sánchez consideró necesario qu'estos proyectos “ayuden a afitar talentu y a crear nueves llinies granibles basaes na innovación y na tresferencia de conocimientu”. Al so xuiciu, los centros d'operaciones (hubs) resulten una ferramienta mui útil pa que los gobiernos seyan más eficaces “a la hora de focalizar, racionalizar y priorizar inversiones”.

Mientres la so intervención, la directora xeneral del Idepa, Eva Pando, esplicó qu’el Gobiernu del Principáu ta diseñando l'Asturies Dixital Innovation Hub (As-DIH) por que se convierta nel preséu central d'un ecosistema pa l'adopción de soluciones venceyaes a la industria 4.0 y enríe el tresformamientu dixital de les empreses industriales.

As-DIH ye'l mediu pa la consecución de los oxetivos de la estratexa d'especialización intelixente Asturies RIS3, que s'articula al traviés de dos nodos o campos d'actuación: fabricación aditiva y analís de datos y sensores y visión artificial.

Nel ámbitu de la fabricación aditiva, l’Idepa aprobó 44 proyectos empresariales nel períodu 2015-2019, con una subvención de 2,68 millones. El 80% de les solicitúes presentaes realizáronse en collaboración col centru d'investigación Idonial, que cunta con quince años d'esperiencia nesti campu.

Asina, n'Asturies yá se tán fabricando pieces, componentes o prótesis médiques personalizaes con tecnoloxía aditiva pa sectores como'l armamentísticu, el metalúrxicu, el biosanitariu y l'aeronáuticu. Ente les investigaciones nes que participa Idonial destaca'l desenvolvimientu de texíos corneales por impresión 3D a partir de célules madre.

Información sobre el documento

© Copyright 2006. Gobierno del Principado de Asturias