Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies empieza la construcción d’una residencia ...
 

Aniciu

El Gobiernu d’Asturies empieza la construcción d’una residencia pa mayores en Llugones con un presupuestu de 6,7 millones

L’edificiu, con más de 7. 203 metros cuadraos y capacidá pa 120 persones, va axuntar singularidá arquitectónica y eficiencia. L’apertura total del centru del Naranco va dexar al ERA crear 166 places nueves nel área d’Uviéu ente’l 2018 y el 2019

04/12/2018

El Gobiernu d’Asturies empezó la construcción de la residencia pa persones mayores de Llugones (Siero), que cunta con un presupuestu d’execución de 6.798.490 euros y un plazu de 24 meses, polo que se prevé que les obres acaben a últimos del 2020. L’edificiu nuevu va disponer de más de 7.203 metros cuadraos de superficie útil, partíos nuna planta semisuétanu y trés volúmenes rectangulares de trés pisos caún que, xuntaos al anterior per un estremu, va asemeyar la forma d’un trébole de trés fueyes.

El semisuétanu, que tamién se va destinar a aparcamientu, va abellugar les instalaciones d’electricidá, calefacción, etc., amás del almacén y los vestuarios. La planta baxa, d’accesu al centru, va acoyer les árees de recepción y alministración, amás de los comedores, la cafetería, les sales de tar y de convivencia y otros servicios como peluquería, podoloxía, ximnasiu, fisioterapia y sala de cures y d’enfermería. Los dos pisos cimeros, con distribución idéntica, acútense pa los cuartos de les 120 persones que van vivir nél. Va disponer de 86 cuartos, de los que 52 (el 60 %) van ser individuales y 34, dobles. Estes plantes van tener tamién cuatro sales destinaes a familiares, de control, el personal y almacén.

La construcción proyectada busca axuntar la singularidá arquitectónica cola eficiencia funcional y un caltenimientu cenciellu. La disposición del edificiu en forma de trébole va dexar menguar el llargor de los corredores y árees de circulación, centralizar la zona de control de les trés ales nun únicu puntu d’intersección, ameyorar la orientación y el repartu de lluz nos espacios y aumentar la seguranza de los usuarios, al crear trés sectores de quema independientes nes plantes de cuartos, caún d’ellos dotáu de dos salíes d’evacuación.

L’edificiu caracterízase pol usu d’enerxía anovable y l’empléu de materiales y sistemes constructivos eficientes, que van favorecer l’aforru enerxéticu y la sostenibilidá. Va tener un altu aislamientu térmicu y gran aprovechamientu solar gracies a la instalación de voladizos y lames que van favorecer la solombra, xunto a grandes superficies acristalaes y carpinteríes d’alta eficiencia que van facilitar la visión del esterior y el pasu de lluz natural. Va cuntar, amás, con un sistema óptimu de refrixeración col filtriáu de contino de tolos espacios al traviés d’aire esterior atemperao y la posterior recuperación de calor con sistemes de tratamientu d’alta eficiencia. Amás, el 40 % del agua caliente sanitario va sacase directamente de la enerxía solar, al traviés de paneles que se van instalar na cubierta, y parte de la enerxía eléctrico tamién lo van apurrir los 40 paneles fotovoltaicos.

 

Recintu cedíu pol Conceyu

L’equipamientu nuevu va llevantase enriba d’un terrén de 5.801 metros cuadraos cedíu pol Conceyu de Siero y allugáu na rodiada del centru de salú y del centru social y de día, al que se va llegar pela cai Puertu Ventana, al norte de la parcela. El tránsitu peatonal va facese pela gran plaza que se va habilitar énte l’edificiu y el tráficu rodao va circular per un vial proyectáu na zona oeste que va comunicar col aparcamientu. El sur de la parcela va destinase al espardimientu de residentes y visitantes y va cuntar con vistes al arboláu.

La Unión Temporal d’Empreses (UTE) Residencia de Lugones, integrada por Iguar Obras, S. L. O., Centro Técnico de Construcciones S. A. y Construcciones Boreste, S. A., que se fixo col contratu depués d’un procesu de llicitación al que se presentaron 13 firmes, va llevar a cabu les obres, qu’empezaron güei col replantéu de los terrenos y la firma de l’acta correspondiente. El proyectu redactóse pola UTE Román Villasana Gutiérrez, Izaskun Bilbao del Olmo y Miguel Rubio Álvarez que, amás, va encargase de la dirección facultativa de la obra, con un presupuestu de 405.350 euros.

La residencia nueva va dexar siguir sumando places al área d’Uviéu, una de les que rexistra mayor demanda. El Gobiernu, al traviés del organismu Establecimientos Residenciales p’Ancianos d’Asturies (ERA), xestiona nesta zona 1.714 places residenciales y prevé l’apertura total de la residencia del Naranco a lo llargo del 2019, cola próxima puesta en serviciu de los 100 primeros puestos y los 66 restantes depués. L’área IV de Servicios Sociales incluye los conceyos d’Uviéu, Siero, Noreña, Salas, Candamu, Les Regueres, Grau, Tameza, Llanera, Sariegu, Cabranes, Nava, Bimenes, Santu Adrianu, Proaza, Teberga, Quirós, La Ribera, Morcín, Riosa, Balmonte de Miranda y Somiedu.

 

Información sobre el documento

© Copyright 2006. Gobiernu del Principau d'Asturies