Gobiernu del Principau d'Asturies

Asturies, muncho más cerca

Tas en

Asturias.es Muyeres L'Institutu Asturianu de la Muyer convoca dos llinies d'ayudes a ...
 

Muyeres

L'Institutu Asturianu de la Muyer convoca dos llinies d'ayudes a les entidaes locales pa lluchar contra la violencia de xéneru

La partida más abondosa, 270. 000 euros, destínase a proyectos y actividaes de prevención y actuación contra esti dañu. Otros 30. 000 euros van destinaos a la creación de puntos lila n'actividaes multitudinaries entamaes polos conceyos

16/07/2019

La Conseyería de Presidencia y Participación Ciudadana, al traviés del Institutu Asturianu de la Muyer, aprobó la convocatoria de subvenciones destinaes a entidaes locales pa la execución de proyectos y actividaes de sensibilización, prevención y actuación contra la violencia de xéneru y la violencia sexual. Dotada con 300.000 euros, el so oxetivu ye reforzar les midíes desenvueltes polos conceyos y otros entes locales nesta materia.

A esta convocatoria van poder optar, hasta'l 7 d'agostu, conceyos y mancomunidaes, al traviés de dos llinies d'actuación:

Sensibilización y prevención en violencia de xéneru: 270.000 euros. Podrá solicitase financiamientu para la celebración de talleres empobinaos a la ciudadanía polo xeneral o a colectivos específicos col fin de prevenir la violencia de xéneru, mesmo que a la organización d'actividaes de sensibilización ya intervención: campañes publicitaries, edición de materiales, vídeos, talleres formativos y terapéuticos

Creación de puntos d'información sobre violencia sexual (puntos lila): 30.000 euros. Esta llinia busca fomentar la creación d'estos puntos n'actividaes multitudinaries qu'entamen los conceyos, pa informar sobre esti problema y p'acoyer y acompañar nun primer momentu a posibles víctimes.

Con estes ayudes refuérzase la coordinación ente alministraciones na llucha contra la violencia de xéneru, tal que se recueye nel Pactu d'Estáu suscritu pol Gobiernu central, les comunidaes autónomes y la Federación Española de Conceyos y Provincies, qu'incide na necesidá de xunir esfuerzos ente los partíos políticos, los poderes del Estáu y la sociedá civil nun compromisu firme a favor d'una política sostenida pa la erradicación d'esti dañu.

La solicitú y demás documentación pa participar nesta convocatoria, que publica güei el Boletín Oficial del Principáu (Bopa), puede llograse nel siguiente enllaz la sede electrónica del Principáu https:// bit.ly/2JOadfZ introduciendo'l códigu de la ficha de serviciu 200286. Nella, atópase'l testu íntegru de la resolución, mesmo que la información complementaria y la posibilidá de realizar electrónicamente el trámite.

 

Información sobre el documento

© Copyright 2006. Gobiernu del Principau d'Asturies