Gobierno del Principado de Asturias

Asturias, mucho más cerca

Estás en

Aniciu El Gobiernu d'Asturies avisa de que los planes del Ministeriu de ...
 

Aniciu

El Gobiernu d'Asturies avisa de que los planes del Ministeriu de Fomentu van retrasar l'apertura de la variante de Payares pelo menos hasta l'añu 2021

El secretariu d'Estáu ratifica nuna xunta cola conseyera d'Infraestructures el cambéu de criteriu del Executivu de Rajoy al respective del anchor de la vía. “Un tema tan estratéxicu nun puede quedar subordináu a pactos que son frutu de la llixereza del PP en conxunción con una alimentación d'egos de Foro”, denuncia Belén Fernández. La cesión al Principáu del tramu de l'autovía AI81 más próximu a Avilés va dexar que les obres de los accesos al PEPA sigan alantre

La conseyera y el director xeneral d'Infraestructures y Tresportes, José María Pertierra, parolen col secretariu d'Estáu y el presidente de Adif, Juan Bravo, ente otres autoridaes

20/04/2017

La conseyera d'Infraestructures, Ordenación del Territoriu y Mediu Ambiente, Belén Fernández, avisió güei de que los planes del Ministeriu de Fomentu van retrasar l'apertura de los túneles de la variante ferroviaria de Payares, que van dexar la llegada de l'alta velocidá a Asturies, hasta, pelo menos, l'añu 2021.

Asina lo aseguró a la salida de la xunta que caltuvo en Madrid col secretariu d'Estáu d'Infraestructures, Julio Gómez Pomar. Anque l'oxetu inicial d'esti alcuentru yera solucionar el problema de los accesos al Parque Empresarial del Principáu d'Asturies (PEPA), la conseyera quixo esponer tamién la esmolición qu'esiste na rexón debíu al cambéu de criteriu, confirmáu güei mesmu pol mesmu ministeriu, al respective del anchor en que se van montar les víes de la variante, que, en virtú d'un pactu ente PP y Foro Asturies, va pasar d'ibéricu a internacional, col perxuiciu consiguiente pa les mercancíes.

El Gobiernu d'España entama, amás, el montaxe de triple filu (una traviesa y trés raíles) na doble vía que pasa ente les localidaes de Llión y La Robla, lo que va dexar dar continuidá al itinerariu n'anchu internacional dende Madrid a La Pola L.lena.

“Tamos bien esmolecíos porque un tema tan estratéxica pal presente y futuru d'Asturies nun puede quedar subordináu a pactos que son frutu de la llixereza del Partíu Popular en conxunción con una alimentación d'egos de Foro Asturies”, llamentó la conseyera.

La responsable autonómica en materia d'infraestructures tamién repitió la urxencia d'axuntar col ministru Iñigo Gómez de la Serna, tres les solicitúes unviaes los díes 24 de marzu, una xornada dempués de que 21 organizaciones económiques, polítiques y sociales firmaren una alianza esixendo al Gobiernu d'España infraestructures que son de la so competencia, y 3 d'abril, posterior al comunicáu de Fomentu en qu'anunció'l montaxe n'anchu estándar.

 

Accesos al parque empresarial y soterramientu en Llangréu

Belén Fernández amosó, d’otra manera, el so contentu pol fechu de que'l secretariu d'Estáu aceptara entregar al Principáu'l tramu final de la carretera AI-81, previa asunción por parte del Gobiernu autonómicu d'un pequeñu ramal de la N-632a, en dirección a Avilés.

Esti compromisu, que va soscribise d’equí a poco mediante un conveniu, va dexar que les obres de los accesos al PEPA, nos que yá s'invirtieron 7,5 millones y que tán executaos en más de dos terceres partes, sigan alantre con normalidá.

Tamién valoró la predisposición del presidente d’Adif, Juan Bravo, pa buscar una solución que dexe executar la superestructura de la llinia de Feve en Llangréu y garantizar el tráficu soterráu de los trenes que circulen ente Xixón y La Pola Llaviana.

Nesti sentíu, d’equí a poco va convocase una xunta p'avanzar nel equipamientu del túnel a la que van asistir el presidente d’Adif, l'alcalde de Llangréu, Jesús Sánchez, y la conseyera.

El Principáu yá destinó 72 millones a una actuación pa la que'l Gobiernu central comprometiera 50 millones con cargu a los fondos mineros, anque dende’l 2011 nun realizó aportación nenguna.

Información sobre el documento

© Copyright 2006. Gobierno del Principado de Asturias