Gobiernu del Principau d'Asturies

Asturies, muncho más cerca

Tas en

Asturias.es El Principáu llogra diez millones de los fondos mineros pa la ...
 

Aniciu

El Principáu llogra diez millones de los fondos mineros pa la reconstrucción de la estación de Payares como motor económicu de L.lena

La inversión va dexar facese con medios mecánicos nuevos y modernizar los d’anguaño. El presidente Adrián Barbón destaca’l sofitu del Ministeriu pa la Transición Ecolóxica y el Retu Demográficu al proyectu ellaboráu pola Conseyería de Cultura, Política Llingüística y Turismu. La conseyera Berta Piñán recuerda que’l so departamentu presentó paralelamente el proyectu a los convenios de transición xusta pa tener más financiación

27/10/2020

El presidente del Gobiernu d'Asturies, Adrián Barbón, anunció güei nel Debate d'Orientación Política que'l Principáu llogró 10 millones de los fondos mineros del Institutu para la Transición Xusta pa financiar el proyectu de reconstrucción de la Estación Ivernal y de Monte Valgrande-Payares como motor económicu del valle de L.lena. La inversión va executase de forma inmediata nuna distribución tresañal (2021-2023), de la que l'Executivu central va apurrir el 75% y l'autonómicu, el 25% restante y cuenta col respaldu del Institutu y el Ministeriu.

Barbón destacó'l sofitu del Institutu para la Transición Xusta, dependiente del Ministeriu para la Transición Ecolóxica y el Retu Demográficu, qu'encabeza la ministra Teresa Rivera, al proyectu ellaboráu pola Conseyería de Cultura, Política Llingüística y Turismu, al traviés de la Dirección Xeneral de Deporte.

Valgrande-Payares, pionera n'España, yá que foi una de les trés primeres instalaciones d'esti tipu que se crearon nel país y la primera del cordal cantábricu, foi motor económicu pal valle de L.lena y tol Caudal, xenerando empléu directu ya indirectu y un fluxu d'empreses qu'ufierten diversos servicios y suministros. Na actualidá, precisa l'actualización de los sos medios mecánicos p’afayase a los cánones modernos nel mundu deportivu.



Apuesta pola estación

La conseyera de Cultura, Berta Piñán, señaló que'l financiamientu “va dexar metese col gruesu de les inversiones que precisen les infraestructures de la estación, mentanto que, per otru llau, el proyectu sigue'l procesu de valoración nos convenios de transición xusta a los que se presentó'l plan va unos meses”.

Los diez millones llograos van dexar desenvolver les principales inversiones nel equipamientu, siguiendo'l plan director ellaboráu, nel que se proyecta la construcción d'un mediu mecánicu principal, amás del desplazamientu y modernización de los esistentes. Nel proyectu figuren tamién una serie d'actuaciones nos remontes ya instalaciones qu'impliquen, amás, un cambéu escontra la eficiencia enerxética.

“Esti Gobiernu demostró un compromisu claru cola estación de Valgrande-Payares y col valle de L.lena, magar les difíciles circunstancies en que nos atopamos. Nun se paró de trabayar pa llograr un futuru pa esta estación tan emblemática y para tol treme social y económico de la zona”, valoró Piñán.

La conseyera amestó qu'anguaño se foi avanzando en tolos compromisos adquiríos, empezando pola constitución de la mesa de trabayu xunto col Conceyu de L.lena y la Cámara de Comerciu d'Uviéu, de cara a los convenios de transición xusta, y siguiendo cola redacción d'informes y del proyectu, que supunxo pal Principáu una inversión de más de 22.000 euros. A esto hai que sumar la puesta en marcha del programa Veranu en Payares, pa desestacionalizar l'usu de la instalación y, agora, el llogru de fondos mineros.

El proyectu de reconstrucción de la estación, qu’estima’l total d’inversiones en 15 millones, básase en dos informes que s’axunten al documentu:


  • El plan director de la estación, fechu esti añu y que desenvuelve una serie d’intervenciones pa modernizar la instalación (remontes, edificios, eficiencia energética, calidá y eficiencia del serviciu), col fin de llograr que siga siendo un referente en cuantes a l’actividad ivernal y que, a su vez, xenere una oferta atractiva a potenciales usuarios pel branu, algamando d’esta manera la desestacionalización turística.
  • L’estudiu d’impactu económicu de la estación sobre les árees d’influencia, ellaboráu pola Cámara de Comerciu d’Uviéu y qu’explica de forma pormenorizada cómo influye’l equipamientu nel valle de L.lena.


Icono gráfico alusivo al tipo de archivo Audiu (Audiu: 681 Kb) (n'español)

Información sobre el documento

© Copyright 2006. Gobiernu del Principau d'Asturies