Gobiernu del Principau d'Asturies

Asturies, muncho más cerca

Tas en

Asturias.es Temes Economía y finances Presupuestos y Cuentes El Gobiernu d'Asturies presenta unos presupuestos de 4.757 ...
 

Presupuestos y Cuentes

El Gobiernu d'Asturies presenta unos presupuestos de 4.757 millones con incentivos fiscales pal mediu rural y un apueste pola ciencia y la innovación

Les cuentes incluyen dos novedaes tributaries: deducciones nel IRPF pa les zones rurales y una xubida de la tasa a les apuestes deportives. Les cuentes, qu'apuesten por fortalecer l'estáu del bienestar, amplíen l'asistencia bucodental a los neños d'hasta 6 años y incluyen bonificaciones nueves nes escueles de 0 a 3

Un momento del acto de presentación

05/12/2019

El Conseyu de Gobiernu aprobó güei’l proyectu de Llei de Presupuestos pal Principáu de cara al añu próximu. Les cuentes de 2020 xuben a 4.757 millones d'euros, lo que supón una medría del 5,1 %.

Les cifres principales que presentó güei la conseyera de Facienda, Ana Cárcaba, son estes:

  • El gastu non financieru ye de 4.159 millones d'euros.
  • La inversión social llega a los 3.195 millones.
  • La inversión productiva ye de 366 millones.

Ana Cárcaba treslladó les cuentes autonómiques a la Xunta Xeneral del Principáu depués de la celebración del Conseyu de Gobiernu, polo qu'a partir d'esti momentu empecipia'l trámite parllamentariu.

Pal 2020, el Gobiernu d'Asturies introduz dos novedaes fiscales. Per un llau, introdúcense deducciones sobre la cuota íntegra autonómica del IRPF que tienen por oxetu combatir la despoblación del mediu rural favoreciendo la natalidá, el fomentu de l'actividá económica y la movilidá. Van ser deducciones nel IRPF por nacencia o adopción, por establecese como autónomu o trabayador per cuenta propia y otra por gastos d'abonos de tresporte. Los posibles beneficiarios van tener que residir en zones rurales o en riesgu de despoblación. Per otra parte, increméntase'l tipu aplicable a les apuestes sobre acontecimientos deportivos, de competición o hípiques, que va pasar del 10 % al 15 %.



Meyores en Sanidá, Educación y Servicios Sociales

Los presupuestos del 2020 nacen col oxetivu claru de fortalecer l'estáu del bienestar del Principáu. Con una inversión social de 3.195 millones (el 67,1 % del total), que supón una medría de 114 millones al respective de les cuentes d'anguaño, el capítulu de Salú ye l'apartáu que mayor presupuestu axunta: 1.827,5 millones.

Salú recibe un 3,5 % más de recursos que nel 2019 y ente les actuaciones previstes destaquen les inversiones n'atención primaria, lo que va dexar empecipiar proyectos como los centros de salú de Sotrondio, La Pola L.lena y Tapia, asina como delles meyores nos hospitales comarcales, ente elles l'ampliación de Cabueñes. Como novedá p'anguaño, va estendese l'asistencia bucodental a los neños d'hasta 6 años.

N'Educación, el presupuestu xube un 5,3 % hasta los 867 millones, lo que va dexar que se dediquen cuasi 13 millones a inversiones en centros educativos como los nuevos IES de La Corredoria, La Fresneda o La Florida y Rei Pelayo de Cangues d'Onís. Tocantes a la etapa de 0 a 3 años, esti presupuestu xube la partida a 17,1 millones. Una novedá ye la bonificación del 100 % de la matrícula pal tercer y siguiente fíu que se matriculen nuna escuela de 0 a 3 años. Esta midida va aplicase a partir del empiezu del cursu 2020/2021.

Nel capítulu de Servicios Sociales, l’asignación llega a los 500 millones, un 10,5 % más, a pesar de que la dotación pal salariu social baxa en 7 millones de resultes del enclín a la baxa na solicitú de prestaciones y la meyora na xestión. Destaca la medría en 3,5 millones pa l'aplicación de la Llei d'Acción Concertada o l'aumentu del presupuestu del ERA en 6,5 millones pa llegar a los 141,8 millones.



Retornu del talentu

La Conseyería de Ciencia, Innovación y Universidá lleva un presupuestu de 185 millones d'euros, de los que 142 millones formen parte del financiamientu de la Universidá.

Nel planu de la Ciencia, van destinar 4,3 millones a partir ente los programes Margarita Salas pa l'atracción y retención de talentu d'investigadores de gran reconocencia internacional; el Programa Jovellanos pa la contratación d'investigadores, tecnólogos, personal técnico y otros profesionales; los Doctoraos Industriales: pal fomentu de la tresferencia de conocencia ente l'ámbitu académicu y el profesional y los denominaos Open Labs, pa favorecer el desenvolvimientu y tresferencia de la conocencia ente'l sector públicu y priváu.



Infraestructures, mediu rural y sofitu al territoriu

El capítulu de tresportes, carreteres y puertos va tener una dotación de 118 millones. Va siguise coles obres del accesu a la plataforma loxística ZALIA, asina como coles actuaciones nes exes interiores entre L’Infiestu y El Campu y ente L.luarca y La Puela Ayande. Amás, acútense 400.000 euros pa l'asistencia técnica de cara a la ellaboración d'un Plan Estratéxicu de Calidá del Aire con horizonte nel 2025.

Pa desenvolvimientu rural ta programada una partida global de 221,4 millones, onde van tener incidencia especial les ayudes pa la incorporación de la xente mozo al campu, que van cuntar con cuasi 13 millones, y la llucha contra les especies invasores.

No que se refier al sofitu a les entidaes locales, destaca'l Fondu de Cooperación Municipal, que s'incrementa hasta los cuasi 8 millones, mentes que se caltién el Programa d'Obres y Servicios tan importante pa los conceyos pequeños con una asignación de 3,1 millones.

La conseyería de Cultura va cuntar con una dotación global de 47 millones. L'apueste pol Camín de Santiago y el desenvolvimientu d'acciones dirixíes a la celebración del Xacobeo 2020 o la promoción turística d'Asturies van ser dos de les sos principales llinies de cara al añu que vien.

   Icono gráfico alusivo al tipo de archivo Programa (Pdf: 805 Kb) (n'español)

Información sobre el documento

© Copyright 2006. Gobiernu del Principau d'Asturies