Gobiernu del Principau d'Asturies

Asturies, muncho más cerca

Tas en

Asturias.es El Principáu va impulsar un plan d’exhumaciones de víctimes del ...
 

Aniciu

El Principáu va impulsar un plan d’exhumaciones de víctimes del franquismu y va participar nel bancu nacional d’ADN

La conseyera de Presidencia comprométese a collaborar col Gobiernu central pa “avanzar na verdá, la xusticia y la reparación pa les persones afectaes”. L’Executivu autonómicu va presentar nes selmanes vinientes la páxina web de Memoria Democrática n’Asturies

izda. a dcha, el secretario de Estado de Memoria Democrática, Fernando Martínez; la Dtora. Gral. de Emigración y Memoria Democrática, Begoña Serrano; el concejal de Hacienda del Ayuntamiento de Parres, Víctor Rodríguez; el teniente de alcalde de Parres, Álvaro Palacios; la consejera de Presidencia, Rita Camblor, y el forense Franciso Echevarría ante la fosa común de víctimas de la represión de la posguerra en El Fitu

29/09/2020

La conseyera de Presidencia, Rita Camblor, anunció güei que’l Principáu va collaborar col Gobiernu d’España nel plan d’exhumaciones de víctimes de la guerra civil y la represión franquista y va participar nel bancu nacional d’ADN que se va crear cola mira de facer más efectiva la identificación.

Camblor fixo estes declaraciones nuna visita col secretariu d’Estáu de Memoria Democrática, Fernando Martínez, y la directora xeneral d’Emigración y Memoria Democrática, Begoña Serrano, a la fosa común d’El Fitu, en Parres. Nesi actu, les dos alministraciones comprometiéronse a establecer un marcu de cooperación pa impulsar planes, proyectos y programes conxuntos nel ámbitu de la memoria democrática.

“L’intercambéu cola Secretaría d’Estáu de les acciones y proyectos que tamos poniendo en marcha dambes alministraciones ye importante p’avanzar nos retos que tenemos per delantre: la verdá, la xusticia y la reparación pa les víctimes”, sorrayó la conseyera.

Amás, la titular de Presidencia avanzó que’l Principáu trabaya yá nel desenvolvimientu de la Llei de Memoria Democrática cola ellaboración del reglamentu de la norma, imprescindible pa crear la comisión técnica y el Conseyu de la Memoria, órganu de participación ciudadana.

Tamién esplicó que nes selmanes vinientes va presentase la páxina web de memoria democrática n’Asturies, que busca una mayor participación y implicación de tola sociedá.



Símbolos de la dictadura

Tocante a la eliminación de símbolos de la dictadura, Camblor señaló que’l procesu ta bramente avanzáu, anque inda queden pendientes detalles significativos. Por esta razón, el so departamentu ta diseñando’l procedimientu pa la comunicación y denuncia d’elementos que ye menester retirar o nos que convién señalizar el so calter franquista.

Al respective de los sitios vinculaos a la memoria histórica, n’ochobre va empezar la restauración, caltenimientu y adecuación de les contornaes. Amás, yá tán llistos los procedimientos pa la solicitú formal de la declaración d’esta clas d’espacios, amás de pa la denuncia d’acciones vandáliques contra ellos.

Paralelamente, el Principáu ta dedicáu a la recuperación de fontes documentales como la recoyida d’archivos particulares y testimonios de los protagonistes de la llucha antifranquista, amás de na dixitalización de les causes militares treslladaes al archivu de Ferrol.

Amás, ta diseñándose una aplicación informática que va recoyer el censu de víctimes y el mapa de foses previstos na llei autonómica, partiendo del inventariu ampliu realizáu pola Universidá d’Uviéu.

Depués de la visita a El Fitu, la conseyera y el secretariu d’Estáu van celebrar un alcuentru con delles organizaciones de memoria histórica, cola mira de tresllada-yos les iniciatives que lidera’l Principáu y el conteníu del anteproyectu de Llei de Memoria Democrática.



Sobre la fosa común d’El Fitu

Los conceyos de Parres y Piloña figuren nel mapa de foses con un total de 29, de les que 26 tienen rexistraes víctimes. En concreto, na d’El Fitu, una de les meyor documentaes, identificáronse 15 víctimes de Cangues d’Onís, Caravia, Colunga y Parres. Tolos fusilamientos foron nos últimos díes de la guerra civil n’Asturies o nos inmediatos a la cayida del Frente Norte, n’ochobre de 1937.

Esta fosa atópase nuna zona de gran cayida de xente pol so valor turísticu, polo que ta previsto señalizala y preparala pal so estudiu, pa la exhumación, y pa la declaración de sitiu de la memoria histórica.


Icono gráfico alusivo al tipo de archivo Audiu (Audiu: 624 Kb) (n'español)

Información sobre el documento

© Copyright 2006. Gobiernu del Principau d'Asturies