Gobiernu del Principau d'Asturies

Asturies, muncho más cerca

Tas en

Asturias.es Les obres d'arreglu de la esplanada de la basílica de Cuadonga ...
 

Aniciu

Les obres d'arreglu de la esplanada de la basílica de Cuadonga obliguen a cortar el tráficu del 25 al 29 de payaresº

La circulación va interrumpise al altor de la rotonda d'El Peregrino ente les 08:00 hores del llunes viniente y les 20:00 hores del vienres. L'accesu va caltenese abiertu a turismos y vehículos de repartu hasta l'hotel Pelayo

22/11/2019

Les obres d'acondicionamientu de la esplanada de la basílica de Cuadonga van obligar a cortar la carretera d'accesu al real sitiu ente los díes 25 y 29 de payares. La interrupción va producise al altor de la rotonda d'El Peregrino, que distribuye'l tráficu a Cuadonga y los llagos. L'accesu va caltenese abiertu a turismos y vehículos de repartu hasta l'hotel Pelayo.

El vial va permanecer cortáu dende les 08:00 hores del llunes, día 25, hasta les 20:00 hores del vienres, 29 de payares, momentu en que va restablecese la circulación pa facilitar l'accesu mientres la fin de selmana.

La Conseyería d'Infraestructures, Mediu Ambiente y Cambéu Climáticu empecipió a primeros d'esti mes les obres na escampada, que suponen una inversión de 433.277 euros.

Les actuaciones, con un plazu d'execución de trés meses, planiáronse teniendo en cuenta la meteoroloxía y les visites turístiques al santuariu. Asina, una tercer parte de la obra va executase no que resta d'añu, otra en primavera y la postrera n'ochobre del 2020, cola mira d'interferir lo menos posible nel accesu al real sitiu.

Los trabayos consisten na reposición del pavimentu dañáu dende la plaza de la Basílica hasta l'empiezu del accesu piatonal a la Santa Cueva, incluyendo la zona de rodadura, la vía sacra y los aparcamientos asitiaos frente a les cases de los canónigos.

Nestes llabores utilizarán los mesmos materiales qu'esisten na actualidá, sacante na zona de tremáu asfálticu frente a les cases de los canónigos, que va sustituyise por piedra caliar Griotte.

Información sobre el documento

© Copyright 2006. Gobiernu del Principau d'Asturies