Gobiernu del Principau d'Asturies

Asturies, muncho más cerca

Tas en

Asturias.es Persones con discapacidá Faedis va caltener nel 2019 el proyectu Compromiso por el empleo ...
 

Persones con discapacidá

Faedis va caltener nel 2019 el proyectu Compromiso por el empleo pa favorecer l'insertamientu llaboral de persones discapacitaes

Esti programa llegó yá a 252 beneficiarios, de los cuales 89 atoparon trabayu y 49 recibieron formación especializada. El patronatu de la fundación aprueba'l plan d'actuaciones y el presupuestu pal añu viniente, que xube a 299. 900 euros

11/12/2018

La Fundación pa la Promoción del Empléu de Persones con Discapacidá (Faedis) va caltener nel 2019 el so proyectu Compromiso por el empleo, qu'aspira a ameyorar l'insertamientu llaboral del colectivu con diversidá funcional. Esta iniciativa, enmarcada nel programa d'ámbitu nacional Masempleo, financiáu dafechamente por ‘la Caixa’ y el Programa Operativu d'Insertamientu Social y Empléu Social (Poises) del Fondu Social Européu, empezó a executase a mediaos del 2017, cunta con un presupuestu global de 573.000 euros y va rematar nel 2023.

Esti plan, escoyíu ente más de 600 de toa España, consiste nel diseñu d'itinerarios personalizaos d'orientación, formación y insertamientu, lo mesmo que d’otres actividaes que favorecen l'accesu a un puestu de trabayu de persones con discapacidá. L'oxetivu ye llegar a 650 beneficiarios a la fin del periodu programáu. Hasta agora, fueron atendíos 252, de los cuales 89 llograron un contratu de trabayu y 49 recibieron formación especializada.

Les actuaciones que se van poner en marcha nel 2019 van concretase desque se valoren les resultancies d'anguaño, tanto per parte de la entidá verificadora del Fondu Social Européu como pola Fundación Bancaria ‘la *Caixa’.

El patronatu de Faedis, presidíu pola conseyera de Servicios y Derechos Sociales, Pilar Varela, aprobó güei’l plan d'actuaciones y el presupuestu pal exerciciu próximu, que va xubir a 299.900 euros, lo qu'implica una xubida del 11 % al respective del actual.

La fundación tamién va prosiguir col programa Incorpora Asturias, que desenvuelve ininterrumpidamente dende’l 2009 gracies a la cofinanciación de ‘la Caixa’, y pal que recibe anualente 40.000 euros. Trátase d'un trabayu en rede con otres seis entidaes: Afesa Nalón, Norte Joven Mieres, Fundación Adsis, Cruz Bermeya, Cocemfe y Secretariáu Xitanu, que busca fomentar ente les empreses una política de responsabilidá social en recursos humanos. Esta midida incluye actuaciones pa la meyora de la empleabilidá, el desenvolvimientu d'itinerarios y llabores d'acompañamientu. Asina mesmo, ufiértense acciones formatives a demanda de les entidaes y asesórase sobre la puesta en marcha de proyectos d’autoempléu.

Faedis, creada en 1993 por iniciativa del Gobiernu d'Asturies, Caxastur y l'Asociación Telefónica p'Asistencia a Minusválidos, ye una entidá ensin ánimu d'arriquecimientu que promueve l'accesu al mundu llaboral de persones con discapacidá física, psíquica o sensorial. Acreitada como axencia de colocación pol Serviciu Públicu d'Empléu del Principáu (Sepepa), ufierta servicios d'orientación y intermediación. La so particularidá como axencia de colocación ye'l trabayu que realiza coles empreses (con una media anual de 300 visites presenciales). Nesti sentíu, impulsa prospecciones d'empléu, acciones de sensibilización y divulgación de les obligaciones llegales sobre la incorporación de persones con discapacidá. Tamién informa sobre les ayudes a la contratación y promueve la responsabilidá social.

Anguaño, concretamente hasta'l pasáu 30 de payares, Faedis xestionó 402 ufiertes d'empléu, de les que 136 concretáronse en contratos pa trabayadores con discapacidá.

 

Información sobre el documento

© Copyright 2006. Gobiernu del Principau d'Asturies