Gobiernu del Principau d'Asturies

Asturies, muncho más cerca

Tas en

Asturias.es Temes Artesanía y comerciu El Gobiernu destaca la relevancia del Plan del Suroccidente como ...
 

Artesanía y comerciu

El Gobiernu destaca la relevancia del Plan del Suroccidente como estratexa integral pa la reactivación socioeconómica de la contorna

La execución del proyectu, qu’identifica potencialidaes y fortaleces pal desenvolvimientu de los cinco conceyos y l’afitamientu de población, llega al 95 % nos sos dos primeros años de vixencia. El conseyeru de Presidencia señala que da respuesta a les necesidaes dende dos planos d’intervención: “la xeneración d’empléu y l’estímulu de l’actividá económica y la meyora de la calidá de vida nel mediu rural”. Martínez señala na Xunta Xeneral qu’alredor de la metá de les 183 actuaciones del documentu incluyéronse a propuesta de vecinos y axentes sociales y económicos

Un momento del acto

18/02/2019

El conseyeru de Presidencia y Participación Ciudadana, Guillermo Martínez, destacó güei na Xunta Xeneral que’l Plan Especial pa los Conceyos del Suroccidente, aprobáu pol Conseyu de Gobiernu’l 26 d’ochobre del 2016, propón soluciones concretes a les necesidaes de los cinco conceyos qu’integren esta contorna, y identifica potencialidaes y fortaleces importantes pa la rexeneración económica y l’afitamientu de población.

Esti plan, con un periodu temporal d’execución hasta l’añu 2025, cunta movilizar 253 millones al traviés de 6 exes, 14 llinies estratéxiques y 33 midíes, que sumen 183 acciones repartíes d’esta manera:

   - Exa 1. Participación local y gobernanza: incluye 7 acciones y ta dotáu con 104.000 euros.
   - Exa 2. Calidá de vida nel mediu rural: 41 acciones y 104.537.056 euros.
   - Exa 3. Infraestructures y tresporte: 13 acciones y 52.175.000 euros.
   - Exa 4. Impulsu de la economía y capacitación: 86 acciones y 85.005.940 euros.
   - Exa 5. Patrimoniu cultural, ambiental y paisaxísticu: 26 acciones y 10.822.000 euros.
   - Exa 6. Simplificación alministrativa: 10 acciones y 377.520 euros.

Nos sos dos primeros años de vixencia (2016 y 2017) acometiéronse inversiones d’alredor de los 50 millones, lo que supón un nivel d’execución averáu al 95 %. Nesti sentíu, el 85,10 % de la inversión destinóse al desenvolvimientu d’acciones enmarcaes nes exes 2 y 4, los relativos a la calidá de vida nel mediu rural y la diversificación de la economía, que concentren el mayor volume de recursos y a los que se dirixeron más de 40 millones.

“El programa dexa dar respuesta a les necesidaes dende dos planos: la xeneración d’empléu y l’estímulu de l’actividá económica y la meyora de la calidá de vida nel mediu rural”, valoró Martínez.

Al so xuiciu, el proyectu ye “una ferramienta de collaboración interinstitucional” que dexa l’accesu a delles víes de financiamientu, col propósitu de que los conceyos de la contorna puedan beneficiase de programes rexonales, nacionales y europeos yá en marcha.

El Principáu caltuvo tamién nel 2018 el so compromisu col desenvolvimientu de la contorna, que se reflexó na puesta en marcha de proyectos y inversiones nel ámbitu sanitariu, la promoción del sector forestal y la meyora de la rede viaria. Ente les actuaciones impulsaes, destaquen la inversión de 939.000 euros na concentración parcelaria de Sorriba-L’Altu La L.lama, en Tinéu, y de 660.000 euros na rede de caminos de la concentración de Vil.ladestre, en Cangas; l’acondicionamientu de la carretera AS-15 (Corniana-puertu de Zarréu), al que se van destinar en total 1.041.709 euros; un paquete d’obres en 5 carreteres que superen los 4,9 millones y afecten a 62 quilómetros; la meyora de caminos y equipamientos forestales por valor de 166.576 euros n’Ibias y el caltenimientu d’inversiones por 100.000 euros en faxes auxiliares y acondicionamientu de montes, amás de dellos proyectos forestales y agrarios n’Ayande por 738.000 euros.

En materia sanitaria, implantóse’l programa de teleictus nel Hospital Carmen y Severo Ochoa y remató la reforma del consultoriu local nuevu de Berducedo, n’Ayande, que da serviciu a 328 vecinos y a los cientos de pelegrinos del Camín de Santiago que pasen cada añu pela zona. Amás, destináronse 293.000 euros a la meyora de los consultorios de Tormaleo y Degaña.



Procesu de participación na ellaboración

Martínez tamién destacó’l nivel tan altu de consensu algamáu na ellaboración del Plan Especial pa los Conceyos del Suroccidente Asturianu 2015-2025, que busca la reactivación económica de la zona pente medies d’una estratexa integral con una intervención nel conxuntu del territoriu. Nesti sentíu, precisó que cuasi la metá de les 183 midíes recoyíes nel documentu incluyóse a propuesta de los vecinos de la contorna y de los axentes sociales y económicos. Tamién señaló que los conceyos d’Ayande, Cangas, Degaña, Ibias y Tinéu realizaron 150 suxerencies y pidimientos rellacionaos col sector primariu, la minería, el turismu y les infraestructures.

“Esti procesu abiertu na so ellaboración convirtió a la ciudadanía del suroccidente en protagonista de los debates y reflexones sobre’l futuru de la contorna”, esplicó. Amás, recordó que toles acciones previstes analizáronse y consensuáronse ente’l Gobiernu d’Asturies, los conceyos afectaos y la Universidá d’Uviéu, y que s’incorporaron propuestes y suxerencies al traviés de 9 meses de trabayu sectoriales, onde participaron 81 asociaciones, entidaes y organizaciones comarcales.

 

Información sobre el documento

© Copyright 2006. Gobiernu del Principau d'Asturies