Gobiernu del Principau d'Asturies

Asturies, muncho más cerca

Tas en

Asturias.es Asturies celebra nel País Vascu’l XXV aniversariu de la marca de ...
 

Aniciu

Asturies celebra nel País Vascu’l XXV aniversariu de la marca de calidá Casonas Asturianas

El Principáu escueye Bilbao pa la conmemoración y pa captar más clientes procedentes de la comunidá vasca. La viceconseyera de Turismu, Graciela Blanco, destaca'l valor de les marques propies como exemplu de collaboración público-privada

La viceconsejera de Turismo, Graciela Blanco, con varios representantes de la marca Casonas de Asturianas

22/11/2019

El Gobiernu d'Asturies escoyó'l País Vascu como sede de la celebración del XXV aniversariu del Club de calidá Casonas Asturianas cola mira de consolidar el Principáu como destín nel mercáu vascu, unu de los sos principales emisores turísticos.

Nel eventu, celebráu anueche en Bilbao, participaron la viceconseyera de Turismu, Graciela Blanco; la viceconseyera vasca de Comerciu y Turismu, Isabel Muela; representantes de Casonas Asturianas; clientes habituales del club; públicu final interesao n'agospiamientos con encantu; periodistes; fotógrafos y axentes de viaxes de receptivu con sede en Vizcaya.

El Principáu creó la marca de calidá y garantía Club de calidá Casonas Asturianas en 1994 col fin d'estremar un segmentu de la ufierta hotelera que, pola so singularidá y niveles de calidá, asina como’l so allugamientu, equipamientu y nivel de serviciu, distínguese del restu d'establecimientos.

El so calter pioneru llevóla a ser referencia pa marques de calidá en toa España, asina como abrir camín pa los otros trés distintivos asturianos: Aldeas, Asturias Calidad Rural; Mesas de Asturias, Excelencia Gastronómica, y Sidrerías de Asturias, Calidad Natural.

Graciela Blanco quixo destacar el valor de les marques propies del Principáu como exemplu de collaboración público-privada “que consiguió aguiyar a los sos competidores cola so ambición de meyora constante, estendiendo un conceptu agora incontestable, pero non tan obviu fai 25 años: el de la calidá como ventaya competitiva”.

La viceconseyera vinculó esti modelu al afitamientu d'Asturies como líder de turismu rural nel norte d'España, con 284.000 turistes anuales n'agospiamientos de turismu rural y cuasi un millón d'estancies nuna planta que supera les 15.000 places rurales, la mayor ufierta de la España Verde.



Campaña nel País Vascu

Coincidiendo cola presentación de Casonas Asturianas en Bilbao, el Principáu empecipió esta selmana una campaña especialmente diseñada p’amplificar l'eventu conmemorativu y captar más turistes vascos, como acción previa a la ponte d'avientu, y de cara a la temporada de seronda/iviernu.

Asina, la campaña Vuelve al Paraísu ta llegando estos díes al públicu al traviés de delles acciones de marketing. Asitiáronse vinilos a la entrada principal de la céntrica estación de Sarriko y una lona asitiada frente al Azkuna Zentroa (antiguu Alhóndiga Bilbao). Asina mesmo, un autobús retuláu con vinilos de la campaña va percorrer mientres una selmana les cais más allegaes de la ciudá, pa siguir el so itinerariu promocional camín de Madrid, pasando polos puntos neurálxicos de Cantabria, Galicia y Castiella y Llión.

Asturies tamién se centró na promoción en Madrid nesti tramu final d'añu, y va aprovechar los soportes más llamativos de dellos centros comerciales de la comunidá pa captar al públicu. L'oxetivu ye asitiar la marca Asturies Paraísu Natural y ampliar el so nivel de recuerdu ente los viaxeros potenciales.

Información sobre el documento

© Copyright 2006. Gobiernu del Principau d'Asturies