Gobiernu del Principau d'Asturies

Asturies, muncho más cerca

Tas en

Asturias.es El Principáu defende'l modelu d'esplotación familiar agraria y ...
 

Aniciu

El Principáu defende'l modelu d'esplotación familiar agraria y planes específicos pa la ganadería estensiva y el sector láctéu na nueva PAC

El conseyeru de Mediu Rural tresllada les llinies sofitaes pol Gobiernu d'Asturies a representantes de los sindicatos. Calvo valora'l marcu financieru previstu pola Unión Europea pal periodu 2020-2027

30/07/2020

El conseyeru de Mediu Rural y Cohesión Territorial, Alejandro Calvo, defendió güei el modelu d'esplotación familiar agraria y l'establecimientu de planes sectoriales y midíes específiques pa la ganadería estensiva, fundamentalmente de vacunu de carne, mesmo que pal sector lacteu, na estratexa nacional que va desenvolver la nueva Política Agraria Común (PAC).

Calvo esplicó esta mañana a los representantes de los sindicatos agrarios la posición que defendió'l Gobiernu d'Asturies na conferencia sectorial, celebrada la selmana pasada.

El titular de Mediu Rural valoró'l marcu financieru de la PAC previstu pal periodu 2020-2027. Al so xuiciu, la negociación europea resultó “bien beneficiosa pa España” yá que, a pesar del brexit y de la pandemia, el país va cuntar “con unos fondos bien asemeyaos a los del anterior periodu, que garanticen la disponibilidad de recursos”.

Al respective de les ayudes de la PAC, mostróse partidariu de que reconozan el papel de les esplotaciones familiares agraries pa tresformar el sistema de producción y algamar los oxetivos en materia de soberanía alimentaria, clima y mediu ambiente. Nesti sentíu, destacó qu'Asturies parte d'una bona posición, cuidao que’l modelu de producción ye medioambientalmente sostenible y ta amestáu a l'actividá en zones d'altu monte y dientro de la Rede Natura.

El Principáu defende, amás, la inclusión de planes específicos y ecoesquemes, tantu pa la ganadería estensiva como pal sector lacteu, una posición compartida pol restu de comunidaes de la cornisa cantábrica.

El conseyeru abogó por disponer de midíes accesibles pa tolos llabradores y ganaderos profesionales d'Asturies y un plus de sofitu pal pastoréu estensivu, la meyora de la biodiversidá, la coesistencia con grandes carnívoros, fixación de CO2, rotaciones de cultivos, xestión de residuos, eficiencia enerxética y aforru d'agua.

El modelu que sofita Asturies ta alliniáu con delles de les estratexes del Pactu Verde Européu, como De la granxa a la mesa y la de Biodiversidá, que plantegen oxetivos de sostenibilidá global, mesmo que la compatibilidá del aprovechamientu de los recursos naturales col caltenimientu de los valores ambientales. Nesti esquema enmárcase l'impulsu a la figura del llabrador xenuinu, que vive y trabaya nel mediu rural, lo que supón un impulsu al modelu d'esplotación agroganadera familiar y sostenible de la cornisa cantábrica.

Tamién se plantegó l'establecimientu del capping o techos d'ayudes que permitan llograr recursos adicionales pa distribuyir ente les esplotaciones los llabradores y ganaderos tienen de ser los destinatarios d'estes ayudes a la renta”, señaló Calvo.

Na so opinión, tolos esfuerzos tienen de centrase en xenerar actividá económica y ameyorar la rentabilidá de les esplotaciones. “El mediu rural ha ser un llugar curiosu pa vivir y trabayar, ameyorando la calidá y l'accesu a los servicios, y ufiertando oportunidaes pa la ciudadanía al traviés de la protección y el sofitu al so sector granible, que puede ser un factor diferencial del desenvolvimientu socioeconómicu d’Asturies”, comentó.

Información sobre el documento

© Copyright 2006. Gobiernu del Principau d'Asturies