Gobierno del Principado de Asturias

Asturias, mucho más cerca

Estás en

Aniciu El Gobiernu d'Asturies pon en marcha la campaña de promoción ...
 

Aniciu

El Gobiernu d'Asturies pon en marcha la campaña de promoción turística Vuelve al Paraíso pa impulsar el desarrollu del sector

La iniciativa, que tendrá por primer vez un mensaxe únicu y un llanzamientu global en soportes nacionales ya internacionales, va contar con una presencia mui relevante n’internet. El conseyeru d’Empléu anuncia que se van divulgar los recursos diferenciales de la comunidá, con imáxenes de los nueve productos prioritarios recoyíos nel Programa de Turismu Sostenible

Un momentu de la presentación

20/03/2017

El conseyeru d'Empléu, Industria y Turismu, Francisco Blanco, presentó güei la nueva campaña de promoción turística pa los próximos años, col eslogan Vuelve al Paraíso, que pretende potenciar los valores de la marca Asturies Paraíso Natural, coles mires de favorecer el desenvolvimientu y la calidá del sector, prioritariu pola so capacidá de xenerar riqueza y empléu.

Con esta premisa, apuéstase por una imaxe y un lema claros y que, frente al estrés, la comida rápido y el ritmu de vida actual, proponen volver a lo natural y conviden a folgar, comer bien y esfrutar de la redolada. Pa ello, escoyéronse semeyes con encuadres panorámicos y lluz natural nes qu'Asturies y los sos atractivos son los protagonistes.

Como principal novedá, la campaña va tener un mensaxe únicu: Vuelve al Paraísu, pero con una llamada a l'acción afayadiza a cada mercáu: Ven a Asturies, pal nacional; Vuelve sentir el Paraísu, pal autonómicu, y Ven al Paraísu Natural d'España, pal ámbitu internacional. Amás, va llanzar de forma global en tolos soportes mañana, día 21 de marzu.

Francisco Blanco sorrayó qu'ún de los grandes retos del so departamentu pasa por reforzar l'allugamientu del destín Asturies en mercaos internacionales. La nueva campaña aprovecha la marca, puntualizando que'l Principáu ye'l Paraísu Natural d'España, pa siguir creciendo en países prioritarios y colos qu'hai bones conexones aérees: Reinu Uníu, Alemaña, Francia, Italia y Portugal.

Asina, van amosase imaxes centraes nos nueve productos que'l Programa de Turismu Sostenible del Principáu, consensuáu col sector, considera prioritarios porque coinciden colos nuevos enclinos del mercáu, representen los valores diferenciales d'Asturies y refuercen la imaxe de marca: turismu rural, activu y deportivu; turismu cultural, industrial, de naturaleza, urbanu, gastronómicu, mariña y pueblos marineros, y Caminos de Santiago.

En concreto, en Selmana Santa, van proxectase les dos gráfiques presentaes güei, bien representatives de la mariña y el monte: Cuideiru y el picu Urriellu, ente que nos siguientes meses van asocedese otres venceyaes colos nueve productos citaos.

La campaña, creada pola empresa Arrontes, tamién plantega novedaes en relación col plan de medios, cuidao que anque va tener presencia en prensa, radio, revistes y esteriores, va ser especialmente relevante n'internet. Per primer vegada, va espublizar na rede social Instagram, amás d'en Facebook, canal pol qu'esta mañana retresmitióse en directu la presentación. Coles mesmes, cuenta con pieces creatives específiques pa estos medios, qu'aspiren a viralizar al máximu los anuncios al traviés de la rede y les aplicaciones móviles.

Los perfiles de Turismu d'Asturies n'internet van espublizar la nueva campaña en dellos idiomes: español, inglés, francés, alemán, italianu y portugués.

Vuelve al Paraísu tamién va tener presencia a partir de mañana nes principales cabeceres de prensa dixital ya impresa, mesmo qu’en diversos soportes esteriores, como estaciones de tren y metro, mupis y monopostes de Madrid, Barcelona, Castiella y Llión, Galicia, Euskadi, Valencia y Sevilla.

 

   Icono gráfico alusivo al tipo de archivo Audiu (Audiu: 322 Kb) (n'español)

   Icono gráfico alusivo al tipo de archivo Cartel Cuideiru (Imagen: 838 Kb)

   Icono gráfico alusivo al tipo de archivo Cartel Picu Urriellu (Imagen: 288 Kb)

Información sobre el documento

© Copyright 2006. Gobierno del Principado de Asturias