Gobiernu del Principau d'Asturies

Asturies, muncho más cerca

Tas en

Asturias.es Emigrantes El Principáu destina 200.000 euros a un programa d'ayuda ...
 

Emigrantes

El Principáu destina 200.000 euros a un programa d'ayuda d'emerxencia pa la colectividá asturiana en Venezuela

L'Executivu y la Fundación España Salú van roblar un conveniu que garantiza la cobertoria sanitaria a persones de menos de 65 años

01/05/2019

El Principáu, al traviés de la Conseyería de Presidencia y Participación Ciudadana, va roblar un conveniu cola Fundación España Salú pal desenvolvimientu d'un programa d'ayuda humanitaria d'emerxencia a la colectividá asturiana en Venezuela, dotáu con 200.000 euros.

Al traviés d'esti alcuerdu, van ponese en marcha dos nueves acciones coles mires de garantizar cobertoria sanitaria y farmacolóxica a persones de menos de 65 años en situación d'estrema gravedá, daqué qu'agora yá s'ufierta a les que superen esa edá, y facilitar l'alquisición d'alimentos per parte de families con escasos recursos

La primer actuación cunta con un presupuestu de 63.500 euros y va permitir emprestar atención médica y suministrar melecines a persones con patoloxíes de calter oncolóxicu, cardiovascular, broncopulmonar, neurolóxicu o psiquiátricu, infección por VIH o diabetes.

Pela so parte, la segunda llinea, que dispón d'un conseñamientu de 135.000 euros, va facilitar la distribución de 750 tarxetes prepagu, caúna d'elles con un saldu añal de 180 euros, para la compra de comida en tiendes, mercaos y supermercaos. Les tarxetes van distribuyise ente tolos miembros de la colectividá asturiana qu'anguaño nun reciben ayudes similares per parte del Gobiernu d'España y ente quien escarecen de recursos pa cubrir les sos necesidaes básiques d'alimentación.

En dambos casos, trátase d'iniciatives que complementen y amplíen los programes desenvueltos pol Gobiernu d'Asturies en favor de los emigrantes en Venezuela y los sos descendientes, a los que se destinaron cerca de 1,1 millones dende 2012 pa garantizar asistencia sanitaria, ayudes individuales y sofitu económicu a les persones retornaes al Principáu.

L'Executivu trata de desaniciar asina la grave situación que carecen les 5.224 persones que, según los últimos datos oficiales, integren la colectividá asturiana nel país y que en mayor midida afecta a families con menores d'edá y a los cerca de 2.000 asturianos mayores de 65 años.

Dende 2014, el Principáu trabaya cola Fundación España Salú en Venezuela pa l'atención a emigrantes y descendientes que superen los 65 años. Agora amplía esa collaboración pa sumase a los nuevos programes humanitarios que punxo en marcha la entidá énte l'agravamientu de la situación económico y social del país, onde los índices de mortalidá y morbilidá crecieron de manera alarmante.

 

Información sobre el documento

© Copyright 2006. Gobiernu del Principau d'Asturies