Gobiernu del Principau d'Asturies

Asturies, muncho más cerca

Tas en

Asturias.es La próxima edición de los World Cheese Awards, el certame de ...
 

Aniciu

La próxima edición de los World Cheese Awards, el certame de quesos más prestixosu del mundu, va celebrase n’Uviéu

Representantes del Principáu, el Conceyu y el sector priváu van collaborar na organización al traviés d'un comité que va presidir Santiago Menéndez de Luarca. nel concursu van participar más de 3.000 productos de los cinco continentes y espérase superar los 10.000 asistentes

dfg72091

17/09/2019

Asturies va acoyer en payares de 2020 la próxima edición de los World Cheese Awards, el certame de quesos más prestixosu del mundu, lo que va suponer un importante impulsu a la proyección internacional de la comunidá y de los sos productos agroalimentarios. El director del concursu y xerente de The guild of fine food, John Farrand, anunció güei qu'Uviéu va ser la sede d'esti eventu y dio a conocer el resultáu de la auditoria internacional realizada sobre la candidatura presentada pola capital del Principáu.

El conseyeru de Desenvolvimientu Rural, Agroganadería y Pesca, Alejandro Calvo, valoró la oportunidá y el reconocimientu al trabayu de llabradores, ganaderos y queseros que supón la celebración del certame n'Asturies. “Puede sirvir como un acelerador pa toa la nuestra industria agroalimentaria y ta en llinia con ún de los nuestros oxetivos, que ye l'impulsu fuerte a la marca nuestra Alimentos del paraíso, a la so campaña de promoción y a la so vinculación cola gran marca que ye Asturias paraíso natural”, destacó Calvo.

Mientres l'actu tamién se robló un protocolu de collaboración ente'l Gobiernu d'Asturies, el Conceyu d'Uviéu, los World Cheese Awards y l'Institutu del Quesu, col fin de consiguir el mayor algame y espardimientu del eventu. Pa entamar el certame constituyiráse un comité formáu por representantes de les instituciones públiques y del sector priváu, que'l so presidente d'honor va ser Santiago Menéndez de Luarca, exconseyeru de Mediu Rural del Principáu; exsubsecretariu del Ministeriu d'Agricultura y exrepresentante permanente d'España énte la ONU pa l'Agricultura y Alimentación (FAO).

Los oxetivos van centrase en trabayar pol allugamientu de los productores de quesu y lácteos del Principáu a nivel internacional, promover la innovación, averar la pequeña y mediana empresa a la prensa especializa y treslladar a la ciudadanía la importancia social d'un sector productor cercanu, profesional y necesariu pa garantizar ecosistemes naturales, basáu na alta d'especialización ganadera con un amenorgáu tamañu d'esplotaciones.



World Cheese Awards

Los World Cheese Awards van cumplir 33 ediciones n'Uviéu. Nesti concursu participen más de 3.000 quesos de los cinco continentes y 250 xueces internacionales van encargase de dictaminar cuálos son los meyores productos del mundu. Espérase que más de 10.000 persones asistan al eventu.

El certame, qu'inclúi tamién una exhibición de productos, va atraer a Asturies a críticos y prensa gastronómica, compradores y distribuidores, que van tener la oportunidá de rellacionase de manera directa colos productores y conocer les últimes tendencies de gastronomía y quesu.

 

   Icono gráfico alusivo al tipo de archivo Audiu (Audiu: 414 Kb) (n'español)

Información sobre el documento

© Copyright 2006. Gobiernu del Principau d'Asturies