Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies rebaxó la llista d’espera de valoraciones ...
 

Aniciu

El Gobiernu d’Asturies rebaxó la llista d’espera de valoraciones de dependencia un 37 % nel últimu añu

Les altes de persones beneficiaries aumentó en 1. 211 de magar se punxo en marcha’l plan de choque. La conseyera de Derechos Sociales señala que nun existen casos que tengan la prestación económica aceptada y tean aguardando a recibila, porque’l principiu del pagu produzse’l mesmu mes en que se reconoz el derechu

La Conseyera de Derechos Sociales Melania Alvarez

29/09/2020

El Gobiernu d’Asturies rebaxó la llista d’espera de valoraciones vinculaes a la dependencia un 37 % nel últimu añu, según manifestó güei la conseyera de Derechos Sociales y Bienestar, Melania Álvarez, nel plenu celebráu na Xunta Xeneral.

Nesti sentíu, apuntó que, de resultes de la puesta en marcha del plan de choque aprobáu en septiembre del 2019 p’acabar coles llistes d’espera nes prestaciones vinculaes a la dependencia, el númberu de persones beneficiares qu’agora reciben una ayuda aumentó en 1.211. Amás, les midíes adoptaes pa entainar cola tramitación supunxeron un aumentu na inversión d’un millón d’euros, hasta algamar los 3,2 millones.

Na so intervención nel plenu, la conseyera esplicó que n’Asturies nun existen persones que tengan la prestación económica reconocida y tean a la espera de recibila, una y bones el principiu del pagu produzse’l mesmu mes en que se reconoz la prestación. “En setiembre, el númberu de beneficiarios de prestaciones económiques xube a 10.436, polo que se producieron 417 altes al respective d’agostu”, añedió.

El plan de choque impulsáu por Derechos Sociales, con una vixencia de dos años, incluye delles acciones que se foron adoptando de forma progresiva. Desque efectuaes toles actuaciones organizatives y de refuerzu de medios personales y materiales, va ponese en marcha’l procesu de tresformación del sistema de dependencia. Pa eso, la conseyería empezó la tramitación de dos decretos que busquen unificar la normativa, cola mira de simplificar y modificar el reconocimientu, y entainar cola tramitación de solicitúes.

Tamién se va fomentar l’atención domiciliaria con dos prestaciones clave: l’asistente personal y la promoción de l’autonomía personal. Amás, los decretos van dexar dotar de más equidá al costu de los servicios pa les persones beneficiaries y va materializar el cambéu del modelu d’atención.



Ingresu mínimu vital

Otra manera, la conseyera esplicó qu’Asturies yá recibió’l consentimientu espresu de 14.700 persones que nestos momentos perciben el salariu social básicu pero qu’han de solicitar l’ingresu mínimu vital.

Hasta agora, l’Institutu Nacional de la Seguridá Social (INSS) tramitó 3.821 espedientes d’ingresu mínimu vital n’Asturies. D’ellos, 2.611 (68 %) foron concesiones y 1.210, denegaciones. Ente estos espedientes xestionaos atópense los d’aquelles persones beneficiaries de la prestación por fíu a cargu a les que l’INSS reconoció d’oficiu l’ingresu mínimu.

De los 198 titulares del salariu social qu’escoyeron solicitar l’ingresu mínimu directamente, reconocióse’l derechu a 182 d’ellos (91 %) y namás se refugó a 16. La Conseyería de Derechos Sociales y Bienestar yá empezó la revisión d’estos espedientes cola mira, nel so casu, d’estinguir o adaptar la cuantía del salariu social.

Información sobre el documento

© Copyright 2006. Gobiernu del Principau d'Asturies