Gobiernu del Principau d'Asturies

Asturies, muncho más cerca

Tas en

Asturias.es La Conseyería de Mediu Rural y Cohesión Territorial ellabora los ...
 

Aniciu

La Conseyería de Mediu Rural y Cohesión Territorial ellabora los mapes de la toponimia oficial d’Asturies

Los trabayos de xeorreferenciación yá acabaron en 49 conceyos, de los que 10 yá tienen mapa

19/11/2020

El Servicio de Cartografía del Principáu, dependiente de la Conseyería de Mediu Rural y Cohesión Territorial, ta ellaborando los mapes de la toponimia oficial d’Asturies. Esti proyectu ye posible gracies a la documentación previa apurrida pola Conseyería de Cultura, Política Llingüística y Turismu y la Xunta Asesora de Toponimia, teniendo en cuenta los criterios de l’Academia de la Llingua Asturiana, y a la collaboración de los propios conceyos.

La Dirección Xeneral d’Ordenación del Territoriu y Urbanismu, área de la que depende Cartografía, va estender esti trabayu a tol territoriu de la comunidá. Hasta la fecha, el llabor de xeorreferenciación yá acabó en 49 conceyos,de los que 10 disponen yá de mapa, ta en marcha en 12 y va escomenzar l’añu qu’entra n’otros 5. Quedaríen pendientes 12 conceyos que nun tienen aprobáu’l decretu de normalización.

Los diez conceyos que yá cuenten colos sos mapes respectivos son Siero, Bimenes, Amieva, Quirós, Ḷḷena, Samartín d’Ozcos, Santalla d’Ozcos, Vilanova d’Ozcos, San Tiso d’Abres y Muros de Nalón.

Los profesionales en materia de cartografía del Principáu ficeron, en collaboración con cada conceyu, un trabayu de xeorreferenciación de los topónimos oficiales incluidos nos decretos d’oficialización pa treslladalos a la cartografía nueva de caún de los conceyos.

Los mapes recueyen con un nivel de detalle bien grande los distintos asentamientos de población: parroquies, villes, aldees, barrios, quintanes tradicionales y cases disperses. Dientro de poco van tar disponibles nel xeoportal de PrincipáuSITPA-IDEAS , dende onde van poder descargase llibremente.

Información sobre el documento

© Copyright 2006. Gobiernu del Principau d'Asturies